У Гомелі пачаўся новы разгляд справы па жорсткім забойстве дзяўчыны-рэпетытара
У Гомельскім абласным судзе 4 лістапада пачаўся новы разгляд крымінальнай справы па жорсткім забойстве 23-гадовай дзяўчыны-рэпетытара Марыны Аляксандравай.
Злачынства было ўчынена летам 2013 года: дзяўчыну забілі яе былы сябар і яго знаёмыя, сямейная пара. Дзяўчына не захацела падтрымліваць з мужчынам блізкія адносіны, і зламыснік са сваімі знаёмымі распрацавалі план забойства.
Марына Аляксандрава займалася рэпетытарствам. Знаёмыя яе былога маладога чалавека заманілі яе пад маркай аказання паслуг рэпетытарства ў кватэру ў Гомелі, дзе жорстка забілі. Затым цела дзяўчыны адвезлі на аўтамабілі ў Веткаўскі раён і закапалі ў зараней падрыхтаванай магіле.
Усіх трох суд прызнаў вінаватымі. Былы хлопец забітай быў прыгавораны да 15 гадоў пазбаўлення волі, два іншыя злачынцы атрымалі па 13 гадоў.
Аднак 2 верасня пастановай судовай калегіі па крымінальных справах Вярхоўнага суда Беларусі прыгавор быў адменены, а справа накіравана на новы разгляд.
Каментары