Каток расійскай прапаганды дакаціўся да беларускіх футбольных фанатаў. На Lenta.ru сёння з’явіўся артыкул, аўтар якога параўноўвае беларускіх «ультрас» з украінскім «Правым сектарам».
Як піша Уладзіслаў Мальцаў у сваім «спецыяльным расследаванні», беларускія заўзятары падчапілі «вірус Майдану» ад сваіх паўднёвых калег: маўляў, беларускіх фанатаў натхняе узор маладых украінскіх хлопцаў «з нізоў», якія цяпер, згодна з аўтарам, «без малога вырашаюць лёс цэлай краіны».
Пры гэтым ашаламляльныя сацыяльныя ліфты і ёсць тое, што вабіць беларускіх фанатаў і робіць іх радыкаламі. Такая думка вынікае са словаў нейкай «ананімнай крыніцы»:
«Іх (фанатаў) куміры — узброеныя хлопцы, якія вырашаюць, каму жыць, а каму памерці.
І ім не істотна, да чаго гэта прывядзе і якая будучыня іх чакае. Сімвалы супраціву сёння — гэта «мова», якую яны не ведаюць, «беларуская лацінка», на якой яны ніколі не будуць пісаць, герб – вышыванка, але галоўнае – гэта сляпая нянавісць да ўсяго рускага і да Расійскай дзяржавы», — сцвярджае аўтар.
Уладзіслаў Мальцаў таксама абураецца сімволікай фанатаў, асабліва фразай «Беларусь мае быць вольнай», якая змешчана на адной з патрыятычных суколак фанатаў «Дынама-Мінск». Такі надпіс падаецца аўтару «шчыра апазіцыйным» — у дачыненні да каго, пры гэтым, не ўдакладняецца.
Непаліткарэктным журналісту падаецца і банер у гонар Перамогі пад Оршай, што беларускія фанаты вывесілі на трыбунах падчас матчу паміж нашай зборнай і камандай Люксембурга.
Аднак, нягледзячы на абвінавачанні нашых заўзятараў у непрыкрытым русафобстве, аўтар знаходзіць патэнцыйных віноўнікаў у выпадку несанкцыянаваных акцый расійскай «ультры» — «беларускія фанацкія групоўкі ідэялагічна апрацоўваюць расійскі футбольны фанацкі рух».
Напрыканцы тэксту аўтар палохае беларускія ўлады тым, што «беларуская апазіцыя» атрымала свой «магутны «Правы сектар», звыклы да боек і здатны на штурм урадавых установаў на бліжэйшых прэзідэнцкіх выбарах».
Цяпер чытаюць
У Тайландзе знікла анліфаншчыца з Пінска. Яе маглі прадаць у М'янму3
Каментары