Саудаўская Аравія прыпыніла працу нафтаправода «Усход — Захад» пасля атакі дронаў з тэрыторыі Ірака. Па ім ідзе 5% сусветнай нафты

Інцыдэнт адбыўся на фоне маштабнага наступлення еменскіх хусітаў, якія падтрымліваюцца Іранам, уздоўж узбярэжжа Чырвонага мора. Хусіты імкнуцца ўзяць пад кантроль Баб-эль-Мандэбскі праліў — яшчэ адзін ключавы маршрут транспартавання нафты з Блізкага Усходу.

Улады Ірака пацвердзілі, што дроны былі запушчаныя з правінцыі Майсан, якая мяжуе з Іранам. Пасля атакі ад пасады адхілілі аднаго з іракскіх вайсковых камандзіраў, які адказвае за аперацыі ў гэтай правінцыі. У Багдадзе заявілі, што расследуюць здарэнне.

Саудаўскія ўлады назвалі прыпыненне працы нафтаправода мерай засцярогі. Аднак спадарожнікавыя здымкі паказалі сляды пажару каля помпавай станцыі побач з Аль-Месбаа, а таксама густы дым у раёне іншай станцыі каля Аль-Дэкры.

Міністэрства замежных спраў Саудаўскай Аравіі паведаміла, што ў выніку атакі ёсць пацярпелыя і нанесеныя матэрыяльныя страты. Іх маштаб пакуль ацэньваецца.

Эр-Рыяд заявіў, што пакуль не плануе ўдараў у адказ і мае намер падтрымліваць намаганні Ірака, накіраваныя на недапушчэнне падобных атак у будучыні. Пры гэтым Саудаўская Аравія пакідае за сабой права прыняць неабходныя меры для абароны свайго суверэнітэту, бяспекі, нафтавай інфраструктуры і насельніцтва.

Нафтаправод «Усход — Захад» працягласцю каля 1200 км злучае нафтавае радовішча Абкайк з портам Янбу на ўзбярэжжы Чырвонага мора. Ён выкарыстоўваецца як альтэрнатыўны маршрут для экспарту саудаўскай нафты, калі транспартаванне праз Армузскі праліў становіцца немагчымым.

Значэнне гэтага маршруту ўзрасло пасля таго, як праз вайну ЗША з Іранам фактычна спыніўся рух праз Армузскі праліў. Раней праз яго праходзіла каля пятай часткі сусветнага нафтавага патоку.

Атаку асудзіла і Рада супрацоўніцтва арабскіх дзяржаў Персідскага заліва, у які ўваходзяць ААЭ, Бахрэйн, Аман, Катар і Кувейт. Генеральны сакратар арганізацыі Джасем Махамед Альбудайві назваў напад небяспечнай эскалацыяй і пагрозай тэрытарыяльнай цэласнасці і жыццёва важным аб’ектам Саудаўскай Аравіі.

Тым часам сітуацыя вакол Баб-эль-Мандэбскага праліва таксама абвастраецца. На гэтым тыдні хусіты ў выніку хуткага наступлення ў Емене ўзялі пад кантроль большую частку ўзбярэжжа краіны. Паводле крыніц Reuters у еменскім урадзе, 11 верасня яны дасягнулі вострава Перым — стратэгічна важнага пункта, які дазваляе кантраляваць Баб-эль-Мандэбскі праліў.

Супрацьстаянне паміж Саудаўскай Аравіяй і хусітамі абвастрылася ў ліпені. Тады Эр-Рыяд нанёс удар па аэрапорце ў сталіцы Емена, які кантралююць хусіты, каб не дапусціць пасадкі іранскага самалёта з высокапастаўленымі прадстаўнікамі хусітаў, якія вярталіся з пахавання вярхоўнага лідара Ірана Алі Хаменеі.

• 1
• 0
• 0
• 0
• 0
• 0
• 1
• 0