Прадпрымальнікаў «Экспабела» вымушаюць перасяляцца на іншую пляцоўку за свой кошт
У сувязі з планамі адміністрацыі гандлёвага цэнтра «Экспабел» ліквідаваць да 1 жніўня будаўнічы і аўтамабільны рынкі, якія размяшчаюцца на яго тэрыторыі ўздоўж мінскай кальцавой аўтадарогі, некалькі дзясяткаў прадпрымальнікаў будаўнічага рынку 24 чэрвеня правялі сход з удзелам журналістаў.
Як сказалі прадпрымальнікі, напярэдадні прадстаўнікі адміністрацыі «Экспабела» заявілі, што рынкі будуць ліквідаваныя ў сувязі з будаўніцтвам аўтамабільнай дарогі, аднак ніякага дакументальнага пацвярджэння з мясцовых органаў улады, паводле іх слоў, адміністрацыя гандлёвага цэнтра не дала.
Замест ліквідаваных рынкаў «Экспабел» прапанаваў прадпрымальнікам заняць новую гандлёвую пляцоўку за гіпермаркетам Bigzz, аднак забараніў ім пераносіць на новыя гандлёвыя месцы старыя боксы і запатрабаваў абсталёўваць пляцоўку нанова. Прадпрымальнікі падлічылі, што кожны з іх з-за гэтага панясе страты ў памеры прыкладна 20 тысяч долараў, а яшчэ прыблізна 15—20 тысяч давядзецца заплаціць за новае памяшканне.
Акрамя таго, прадстаўнікі «Экспабела» паведамілі, што на новай пляцоўцы прадпрымальнікі змогуць працаваць на працягу двух гадоў, пасля чаго на гэтай тэрыторыі будзе пабудаваны буйны бізнес-цэнтр, аднак арэндныя адносіны на новым месцы з імі па невядомай прычыне плануюць заключыць толькі на паўгода.
Прадпрымальнікі не згодныя з умовамі, якія выстаўляе кіраўніцтва «Экспабела», і заяўляюць, што ва ўмовах крызісу і падзення попыту абсталяванне новых гандлёвых плошчаў павінна весціся за кошт гандлёвага цэнтра. Паводле іх слоў, кошт арэнды на гэтым рынку і так адзін з самых высокіх у сталіцы і дасягае 25—26 еўра за кв. метр, у той час як іншыя рынкі стараюцца ісці на ўступкі арандатарам, каб запаўняць гандлёвыя рады.
Пры гэтым, заяўляюць прадпрымальнікі, умовы працы на рынку «Экспабела» не самыя выгадныя — адміністрацыя цэнтра патрабуе абсталёўваць, рамантаваць і добраўпарадкаваць арандаваныя месцы за свой кошт. У той жа час у прадпрымальнікаў ёсць нараканні наконт аховы рынку. Напрыклад, некаторы час таму некалькі боксаў абрабавалі. Акрамя таго, нягледзячы на наяўнасць аховы, на тэрыторыі рынку ў непрацоўны час збіраюцца гараджане, якія выпіваюць і смецяць каля боксаў, а ў выніку за беспарадак на працоўных месцах прадпрымальнікі атрымліваюць ад адміністрацыі рынку буйныя штрафы.
Пасля сустрэчы з журналістамі ўдзельнікі сходу правялі перамовы з дырэктарам «Экспабела» Пятром Сінкевічам. Ён заявіў, што прадпрымальнікі, з якімі дагаворы арэнды заключаныя да 1 ліпеня, змогуць прадоўжыць працу да 15 ліпеня на падставе дадатковага арэнднага пагаднення.
Прадпрымальнікі маюць намер звярнуцца па дапамогу ў вырашэнні гэтай сітуацыі да кіраўніцтва Мінскай вобласці.
Цяпер чытаюць
У віцэ-спікеркі Каардынацыйнай рады Лізаветы Пракопчык сабралася $12 тысяч даўгоў88
Каментары