На ўрачыстым прыёме Асацыяцыі карэспандэнтаў пры Белым доме ў гатэлі Washington Hilton адбылася страляніна. На мерапрыемстве прысутнічалі прэзідэнт ЗША Дональд Трамп, першая лэдзі і ключавыя міністры, але ніхто з іх не пацярпеў. Кім быў нападнік?
Падазраванага завуць Коўл Томас Ален, паведамляла агенцтва Reuters. Гэта 31‑гадовы настаўнік і распрацоўшчык гульняў з Каліфорніі, раней ён не трапляў у поле зроку паліцыі.
Па выніках 2024 года мужчына быў прызнаны найлепшым настаўнікам кампаніі C2 Education, якая рыхтуе абітурыентаў да ўступных экзаменаў у ВНУ, у горадзе Торранс у Каліфорніі.
Томас скончыў у 2017 годзе Каліфарнійскі тэхналагічны інстытут, у 2025‑м атрымаў ступень магістра ў галіне кампутарных навук у Каліфарнійскім дзяржаўным універсітэце.
На прыёме з удзелам Трампа прагучала 5‑8 выстралаў. Паводле паліцыі, мужчына быў узброены драбавіком, пісталетам і некалькімі нажамі. Яго затрымалі на месцы.
Стралок сказаў уладам, што яго цэллю былі чыноўнікі, звязаныя з Трампам, паведамляе тэлеканал CBS News. Ён змог хутка прабегчы міма аховы — агенты не паспелі яго затрымаць на ўваходзе і сталі страляць услед. Са слоў паліцыі, мужчына страляў у аднаго з агентаў сакрэтнай службы, але таго абараніла бронекамізэлька.
Сам стралок не атрымаў агнястрэльных раненняў.
Дональд Трамп пракаментаваў інцыдэнт і назваў нападніка «вельмі хворым чалавекам» і «забойцам-адзіночкам».
Мерапрыемства, на якім адбылося здарэнне, адкладзена як мінімум на месяц.
Цяпер чытаюць
«Людзі каментавалі, што сальманела ўвайшла ў чат». Беларус паехаў працаваць у Крэмніевую даліну — і стаў кулінарным блогерам на 28 мільярдаў праглядаў2
Каментары