Наведніцы мінскага рэстарана прыгразілі судом за абразлівы допіс у фэйсбуку
Falcone няўдала пажартаваў пра наведніц як доказ таго, што ён не «самы дарагі рэстаран».
У афіцыйнай суполцы мінскага рэстарана Falcone 13 ліпеня з’явілася фота дзвюх наведніц сталага веку з подпісам «Самы дарагі рэстаран? Ды ладна, вось вам адваротны доказ!». Пазней яно было выдаленае. Гісторыя няўдалага жарту атрымала розгалас у беларускіх СМІ.
Жанчыны на фота не выглядаюць беднымі ці непрыстойна апранутымі — яны проста не маладыя дзяўчаты. Як выявілася пазней, яны на самой справе далёка не бедныя: абедзве з'яўляюцца дырэктарамі турфірмаў. І збіраюцца ісці ў суд.
Выпадак падрабязна апісаў Kyky.org. У каментарах да фота карыстальнікі адзначалі неэтычнасць такога жарту з узросту ці сацыяльнага статусу наведнікаў, непавагу да наведнікаў. Спецыялісты па маркетынгу ў сацсетках казалі, што такія выпадкі могуць быць прыкладам таго, як не трэба працаваць — і прыводзяць да звальнення адказнага супрацоўніка. Рэстаран сцвярджае, што аўтар паста быў звольнены адразу пасля таго, як пра выпадак пачуў дырэктар.
Адна з жанчын на фота распавяла «Камсамольскай праўдзе ў Беларусі», што іх фатаграфавалі без іх згоды: за суседнім столікам хлопец і дзяўчына нібы здымалі бутэльку віна. Праз некалькі дзён супрацоўнікі паказалі ёй фота. Яна дамаглася асабістай сустрэчы з дырэктарам, які, паводле яе слоў, пераклаў адказнасць на прэсу і прапанаваў кампенсаваць шкоду абедамі за кошт установы. «Зараз дырэктар спрабуе папрасіць прабачэння. Але я не хачу ніякіх выбачэнняў, — кажа яна. — Мяне абразілі і зганьбілі на ўсю краіну. Мы з маёй сяброўкай збіраемся ісці ў суд».
Дырэктар рэстарана выказаў сваё меркаванне на Onliner.by. Ён лічыць, што рэстаран «прадставілі ў вобразе абыякавых і беспрынцыповых капіталістаў», ператварылі пост у «рэспубліканскі феномен». Ён падкрэслівае, што рэстаран выдаліў «спрэчны пост» задоўга да выхаду першых артыкулаў. «Нас папракалі, маўляў, навошта размясцілі фота. Размясцілі таму, што былі рады, што да нас прыходзяць самыя розныя госці! — піша ён. — І дарэчы, пасля ўсёй інфармацыйнай шуміхі, калі фота набыла зусім іншы сэнс, ні адно выданне не адмовілася яго публікаваць і тыражаваць. Ніхто не ўзгадаў пра этыку, папрокі і парады, што давалі нам жа. Правіла «не нашкодзіць» не спрацавала, калі намаляваўся «прыгожая» скандальная інфармацыйная нагода».
Тым часам суд з нагоды паста, калі адбудзецца, можа стаць першым у Беларусі, у якім старонка ўстановы ў сацсетцы выступіць у ролі інтэрнэт-СМІ ў адпаведнасці з новым законам.
Цяпер чытаюць
Загнуўся бізнэс члена хакейнай каманды Лукашэнкі, які абяцаў пабудаваць лыжны манеж за Вярхоўным судом узамен на ласыя ўчасткі1
Каментары