БАТЭ (Беларусь) — «Дандалк» (Ірландыя) — 0:0.
Барысаўскі БАТЭ правёў матч у адказ другога кваліфікацыйнага раўнда футбольнай Лігі чэмпіёнаў.
Тыдзень таму ў Беларусі БАТЭ не змог забяспечыць сабе камфортную перавагу перад выездам у Ірландыю да «Дандалка» - 2:1. Гэта значыць, што ўсяго адзін мяч супернікаў выводзіў бы іх у наступны раўнд. Нешта падобнае ўжо здаралася пару гадоў таму ў супрацьстаянні з македонскім «Вардарам». Тады дома БАТЭ перамог 3:2. А ў гасцях адстаяў нулявую нічыю.
Пікантнасці гульні БАТЭ ў Ірландыі дадаваў той факт, што гульня праходзіла на стадыёне са штучным пакрыццём. А гэта ўжо зусім іншая песня, іншыя хуткасці, іншыя адскокі мяча. Ясна, што «Дандалк» у такіх умовах пачуваецца больш камфортна, гульцам каманды ўжо вядомая кожная купіна на полі.
Што тычыцца складаў каманд, то трэнер барысаўцаў Аляксандр Ермаковіч зрабіў адну-адзіную замену, калі параўноўваць з першым матчам. Замест Яўгена Яблонскага, які дапусціў памылку ў адзіным прапушчаным мячы нашай каманды, у старце з'явіўся Ілля Алексіевіч. Па-ранейшаму ў цэнтры абароны гуляў латыш Каспарс Дубра, які замяняў траўмаванага Дзяніса Палякова.
Варта адзначыць, што гэтым разам «Дандалк» не здзіўляў БАТЭ сваім напорам, як гэта было ў Барысаве. Беларускі клуб усё ж часцей валодаў мячом, ствараў моманты. Асабліва ў першыя хвіліны вылучаўся капітан БАТЭ Віталь Радзівонаў, якога амніставала УЕФА за сутычку ў матчы тыднёвай даўніны. Радзівонаў пачаў матч супербадзёра, біў з самых розных пазіцый, але ўвесь час бракавала дакладнасці.
Зрэшты, адзіны свой момант ірландцы ўсё ж займелі. І зноў здарылася гэта пасля дурной абрэзкі нашай абароны. Нападаючы Макмілан меў амаль булітны выхад, але слава Чэрніку, які ў адказны момант не дзёрнуўся.
Зрэшты, было чаму засмуціцца ў першым тайме і барысаўцам. Ужо напрыканцы стартавай саракапяціхвілінкі Ігар Стасевіч не рэалізаваў цудоўны шанец. Мяч пасля яго ўдару сустрэўся з бэлькай.
Малюнак гульні ў другой палове асабліва не змяніўся. Беларускі чэмпіён атакаваў, ірландскі абараняўся. Хто толькі ў складзе БАТЭ ні біў па варотах, але, як нейкае пракляцце, мяч упарта не залятаў у вароты.
Матч атрымліваўся надзвычай нервовым. Уявіце, што любая памылка ў такой сітуацыі магла стаць ракавой. А «Дандалк» яшчэ гналі наперад шматлікія заўзятары. Вытрымалі. У найцяжэйшым матчы галоў забіта так і не было - 0:0.
БАТЭ працягвае сваю дарогу ў Лізе чэмпіёнаў. Супернік нашага клуба будзе венгерскіі «Відэатон», які ў дадатковы час зламаў супраціў валійскага ТНС (1:1).
Сілавікі працягваюць умацоўваць свае будынкі, баючыся паўстання18
Каментары