Знайшлі статуэтку «Оскара» Паўла Таланкіна, што згубілася падчас пералёту з Нью-Ёрка ў Франкфурт
Узнагарода, атрыманая за дакументальную стужку пра ўплыў прапаганды на падлеткаў у Чалябінскай вобласці, знікла пасля таго, як амерыканскія службы бяспекі прымусілі рэжысёра здаць яе ў багаж.
Авіякампанія Lufthansa знайшла залатую статуэтку ў аэрапорце Франкфурта-на-Майне, піша Deutsche Welle.
Прэс-служба авіякампаніі афіцыйна пацвердзіла, што статуэтка «Оскар» Паўла Таланкіна знаходзіцца ў бяспецы ў Германіі. Перавозчык ужо прынёс прабачэнні рэжысёру і цяпер высвятляе, ці застаецца ён у Франкфурце, каб арганізаваць перадачу ўзнагароды.
Паралельна кампанія праводзіць унутранае расследаванне, каб зразумець, якім чынам каштоўны груз быў страчаны падчас транспарціроўкі.
Гісторыя са знікненнем статуэткі здарылася 29 красавіка падчас пералёту Таланкіна з Нью-Ёрка. Перад вылетам з аэрапорта імя Джона Кенэдзі супрацоўнікі бяспекі ЗША палічылі «Оскар» патэнцыйна небяспечным прадметам і запатрабавалі адправіць яго ў багажнае аддзяленне, пасля чаго сувязь з узнагародай была страчана. Гэты інцыдэнт выклікаў хвалю абурэння сярод кінематаграфістаў і грамадскасці.
Павел Таланкін атрымаў прэмію Амерыканскай кінаакадэміі за фільм «Містар Ніхто супраць Пуціна», які заснаваны на ўнікальных здымках адной са школ Чэлябінскай вобласці. Рэжысёр, які пакінуў Расію ў 2024 годзе, паказаў, як менавіта ў школьных сценах фармаваліся настроі маладога пакалення расіян.
Цяпер чытаюць
Арыштаваны сенатар Карпіцкі, галоўны доктар Брэсцкай абласной бальніцы13
Каментары