Смерць Сусвету ва ўяўленні мастака. Выява: Moonrunner Design для National Geographic
Сусвет павольна памірае, ён выпрацоўвае ўдвая менш энергіі, чым 2,3 млрд год таму, пішуць (PDF) астрафізікі ў часопісе Monthly Notices of the Royal Astronomical Society. Іх назіранні дазволілі спрагназаваць час смерці Сусвету.
Праз сто трыльёнаў год згаснуць чырвоныя карлікі — апошнія яскравыя зоркі Сусвету. Пасля іх застануцца толькі чорныя дзіры, нейтронныя зоркі ды неяскравыя белыя і карычневыя карлікі. Любое жыццё стане абсалютна немагчымым.
Праз квадрыльён (1 000 000 000 000 000) год знікнуць апошнія планеты. Праз 10 квадрыльёнаў год чорныя дзіры паглынуць апошнія зоркі.
А самі чорныя дзіры знікнуць праз дзве дзясятых гугла (2 і яшчэ 99 нулёў) год — яны выпарацца праз выпраменьванне Хокінга (адзінае, што з іх вылятае). Пасля па сусвеце будуць лётаць толькі неўпарадкаваныя электроны, фатоны і пазітроны.
Той факт, што Сусвет памрэ, не ёсць шокам для навукоўцаў. Аб магчымым згасанні Сусвету вядома прынамсі з 1990-х, але дакладны яго механізм да нядаўняга часу быў нявызначаным.
Цяпер даследчыкі пацвердзілі тэорыю аб згасанні Сусвету. Яны назіралі за найбліжэйшымі да нас 220 тысячамі галактык праз дзясяткі наземных і касмічных тэлескопаў і ацанілі выпраменьванне ў двух дзясятках дыяпазонаў, ад радыяхваляў да ультрафіялету.
