Беларусь разлічвае на дапамогу еўрапейскіх партнёраў у пры ўпарадкаванні мяжы з Украінай. Аб гэтым заявіў сёння журналістам міністр замежных спраў Беларусі Уладзімір Макей па выніках перагавораў са сваім украінскім калегам Паўлам Клімкіным.
Уладзімір Макей адзначыў, што Беларусь і Украіна цяпер актыўна працуюць над дэмаркацыяй агульнай граніцы. «Спадзяёмся, што гэты працэс не будзе прыпынены і будзе развівацца актыўна», - сказаў ён.
Міністр звярнуў увагу на тое, што ўпарадкаванне граніцы — вельмі складаная, фінансаваёмістая, матэрыялаёмістая і працаёмкая работа, і на гэта спатрэбіцца як мінімум некалькі бліжэйшых гадоў.
«Але прэзідэнтам Беларусі пастаўлена дакладная задача па ўпарадкаванні граніцы Беларусі з усімі краінамі-суседзямі. І мы спадзяёмся, што ў гэтым годзе рушым наперад у плане дэмаркацыі граніцы з нашымі ўкраінскімі сябрамі», — сказаў міністр. Паводле яго слоў, на 2014—2015 гады запланавана ўпарадкаваць амаль 580 км сумеснай мяжы, пры гэтым большая частка работ ужо выканана.
«Я ўпэўнены, і мы сёння гаварылі аб гэтым, што ў нашых агульных інтарэсах, што было б нядрэнна з улікам цяперашняй складанай фінансава-эканамічнай сітуацыі, каб нашы еўрапейскія партнёры аказалі ў гэтым садзейнічанне. Нашы пагранічныя ведамствы працуюць у гэтым напрамку», — сказаў Уладзімір Макей.
Павел Клімкін у сваю чаргу адзначыў, што граніца «ні ў якім разе не будзе раздзяляць украінцаў і беларусаў, гэта не будзе перашкода для міжасобасных кантактаў».
Каментары