Хлопец, які спяваў з салістам Aerosmith у Маскве, іграе ў Мінску на Нямізе
Вулічны музыка Саша Анісімаў, які на пачатку верасня праславіўся сваім дуэтам са Стывам Тайлерам з Aerosmith на Кузнецкім мосце ў Маскве, прыехаў у Мінск.
Увечары 16 кастрычніка Саша размясціўся паміж станцыяй метро «Няміга» і Палацам спорту ды пачаў свой вулічны сэт. На гукі пачала сыходзіцца моладзь. Некаторыя з іх даведаліся пра выступ Сашы ў Мінску праз сацыяльныя сеткі і распавялі Еўрарадыё, што ўсё лета адхадзілі на выступы музыкі на вуліцах беларускай сталіцы. Моладзі падабаецца Сашына адданасць і прафесійны падыход да справы. Пакуль Еўрарадыё слухала Сашу, ён выканаў песні гуртоў 30 Seconds for Mars, The Cranberries, Pizza і Макса Каржа.
Па словах музыкі, у яго два тыдні таму нарадзіўся трэці хлопчык. Сям'я жыве ў Браславе разам з бацькамі яго жонкі. А паколькі музыка — гэта адзіны даход у сям'і Анісімавых, Саша вымушаны выйсці на вуліцы. Калі наступны раз музыка прыедзе ў Мінск, ён пакуль не ведае. Сёння з-за холаду публікі было не шмат, ды і з «падзякай» яна не спяшалася.
«Відаць, сёння я прыехаў паспяваць, а не зарабіць», — уздыхнуў хлопец і зацягнуў чарговы хіт.
Нагадаем, хлопец доўгі час жыў у Мінску і граў на вуліцах беларускай сталіцы. Летам на яго сэты збіралася па 100-200 слухачоў. Аднак з-за ўвагі міліцыі да вулічных музыкаў, Саша Анісімаў вымушаны быў з'ехаць у Маскву. Там, па яго словах, музыкі спакойна адчуваюць сябе на вуліцах і могуць добра зарабляць.
Каментары