Іван Шыла: 15 прыкметаў таго, што вы нарадзіліся альбо выхоўваліся ў Беларусі
Карыстальнікі інтэрнэту спрабуюць вызначыць, да якога сьвету належыць Сьвятлана Алексіевіч, падлічваючы колькасьць словаў з коранем «рус» ці «бел» у яе нобэлеўскай лекцыі. На маю думку, вызначыць, што вы беларус альбо былі выхаваныя ў гэтай краіне, можна з дапамогай такіх простых і іранічных апісаньняў. Пазнаеце сябе ці знаёмых — вы частка беларускага сьвету.
1. Для вас назва «Бабруйск» ня сьмешная, а «Белоруссия» няправільная.
2. Палова вашых знаёмых навучаецца на платным, вы плаціце за пломбу пятую частку месячнага заробку, хоць у краіне бясплатная мэдыцына і адукацыя, і вы лічыце гэта нармальным.
3. Вы баіцеся начальства, непрацягненьня кантракту, міліцыі на вуліцы, дэкрэтаў прэзыдэнта і сталеньня яго малодшага сына і нават турнікета ў мэтро — пры спробе прайсьці без жэтона ён можа ўдарыць.
4. Вы слухаеце чыноўнікаў і робіце наадварот: калі па тэлебачаньні кажуць, што дэвальвацыі ня будзе, вы спяшаецеся ў абменьнік.
5. Вы лічыце сябе мірным і талерантным, але ня любіце расейскіх турыстаў, туркмэнскіх студэнтаў і турэцкіх кавалераў беларускіх жанчынаў. Асабліва кавалераў.
6. Вы жывяце ў краіне пяцігодак, а колькасьць дошак гонару на квадратны кілямэтар тут самая вялікая ў Эўропе. Пяцігодкі супадаюць з прэзыдэнцкімі выбарамі, і ад пяцігодкі да пяцігодкі ўсё расьце. Праўда, мінулы раз выявілася, што рухацца мы пачалі ў адваротны бок — замест росту заробку да 1000$ у наступнай пяцігодцы, ён упаў да 300.
7. Вы навучыліся пратэставаць бяз словаў, бо і так усё ўсім ясна.
8. Вы ставіцеся да Лукашэнкі як да дажджу: супраць дажджу няма сэнсу змагацца, можна зьехаць у іншую краіну, дзе яго менш, можна набыць парасон, проста прызвычаіцца і нават палюбіць. Альбо казаць, што дождж гэта лепш, чым завіруха.
9. Вы ведаеце, што такое падатак на дармаедаў.
10. Вы ведаеце дату нараджэння вашага прэзыдэнта да таго як ён зьмяніў і пасьля таго. Вы штогод глядзіце парады, якія прымае хлопчык у генэральскай форме. Іронія і самаіронія вам моцна дапамагаюць глядзець на тое, што адбываецца.
11. Вы ведаеце, што дзеці выступаюць на Эўравізіі лепш, чым дарослыя, вы ведаеце, што БАТЭ ў сьвеце ведаюць лепш, чым назву беларускай сталіцы, а хакейны чэмпіянат запомнілі не спартовымі посьпехамі, а танным алькаголем і магчымасьцю спажываць яго паўсюль і з замежнікамі.
12. Вы думаеце, што ведаеце беларускую, бо вучылі яе ў школе адну гадзіну на тыдзень, але калі пачынаеце размаўляць, вам робіцца сорамна.
13. Вы лічыце сябе рэлігійным чалавекам, ходзіце ў царкву раз у год, чытаеце гараскопы і сьвяткуеце Купальле.
14. Вы лічыце, што жывяце ў маленькай і мірнай краіне, хоць яна сувымерная з Брытаніяй і трывала застаецца ў лідарах па колькасьці забойстваў на бытавой глебе. Вы ведаеце, што значыць дэвіз «абы не было вайны».
15. Вы былі ў Макдональдзе са школьнай экскурсіяй, і гэта было важней, чым паездка ў тэатар.
Каментары