Колькі каштуюць акуляры-авіятары, як у Макрона? Гэта французскі люксавы брэнд
Прэзідэнт Францыі Эмануэль Макрон з’явіўся на Сусветным эканамічным форуме ў Давосе ў акулярах-авіятарах. «Гэта праз невялікую праблему», — тлумачыў ён, чаму апошнім часам хавае пачырванелае вока. На Макроне былі акуляры французскага люксавага брэнда Henry Jullien. У той жа дзень сайт брэнда не вытрымаў наплыву наведвальнікаў і перастаў працаваць, піша РБК.
Французскі прэзідэнт выбраў мадэль Pacific S 01 з сінімі люстранымі лінзамі і ў пазалочанай аправе коштам €659. На хвалі поспеху брэнд стварыў на сваім сайце часовую старонку, прысвечаную толькі гэтай мадэлі.
На выраб адной пары сыходзіць да чатырох месяцаў: акуляры выраблены і сабраны ўручную з выкарыстаннем традыцыйнай тэхнікі залачэння на заводзе Лонс-ле-Санье, лінзы вырабляюцца ў рэгіёне Юра кампаніяй Dalloz у Сен-Клодзе. Менавіта гэты факт — што акуляры цалкам французскай вытворчасці — некалькі гадоў таму падкупіў Макрона.
«Ён не прыняў іх у падарунак. Ён настаяў на тым, каб купіць іх самому», — растлумачыў Стэфана Фульшыр, уладальнік iVision Tech. У 2023 годзе Фульшыр выкупіў Henry Jullien, кампанію з больш чым векавой гісторыяй, захаваўшы вытворчую пляцоўку ў рэгіёне Франш-Кантэ.
Аэракасмічная сталь, золата, тытан — брэнд акуляраў Henry Jullien спалучае інавацыі і традыцыі ручной працы, за што ў 2018 годзе быў удастоены ўзнагароды EPV (Entreprise du Patrimoine Vivant, «прадпрыемства жывой спадчыны»). Яна прысуджаецца кампаніям, якія маюць глыбокія карані ў Францыі, валодаюць перадавымі тэхналогіямі, патэнтамі і гістарычнымі архівамі.
Каментары