9 снежня Максіміліяну Пякарскаму падчас двухгадзіннага допыту паведамілі, што яго абвінавачваюць па крымінальнай справе, распачатай за графіці «Беларусь мае быць беларускай» і «Рэвалюцыя свядомасці».
Абвінавачванне было перакваліфікаванае з артыкула 339 (частка 2) Крымінальнага кодэксу – «Хуліганства, здзейсненае групай асоб» на артыкул 341 КК «Апаганьванне будынкаў і псаванне маёмасці». Гэты артыкул прадугледжвае штраф, грамадскія працы або арышт тэрмінам да 3 месяцаў. Экспертыза графіці засведчыла, што прыкмет экстрэмізму на малюнках не выяўлена. З яго знятае абвінавачванне за псаванне білборда.
Пякарскі настойвае на тым, што гэта адміністрацыйная справа, а не крымінальная.
10 снежня на допыт быў выкліканы Вадзім Жаромскі. Допыт у хлопца доўжыўся 4 гадзіны. Яму пакінулі абвінавачванне па ч. 2 артыкулу 339 КК (хуліганства, здзейсненае групай асобаў) і дадалі артыкул 341 КК (апаганьванне збудаванняў і псаванне маёмасці). Жаромскаму пакінулі ўсе 3 эпізоды справы: маляванне двух графіці ды псаванне фарбай сацыяльнага банера з выявай супрацоўнікаў міліцыі па вул. Гарэцкага ў Мінску. Абвінавачванне ў хуліганстве Жаромскі не прызнае, сцвярджае што ім рухалі творчыя матывы. Толькі што хлопцу паведамілі, што яго чакаюць на дадатковы допыт у панядзелак, у сераду яму прад'явяць канчатковыя абвінавачванні.
Сёння Вячаслава Касінерава перавялі са статуса падазронага ў статус абвінавачанага. Следчыя знялі эпізоды з нанясеннем графіці, але пакінулі псаванне білборда. Цяпер ён праходзіць па арт. 339, частка 2, матэрыяльны ўрон за які хлопцы цалкам кампенсавалі. Канчатковае абвінавачванне хлопцу прад'явяць у сераду.
З чацвёртага ўдзельніка справы, Яраслава Ульяненкава, знялі ўсе абвінавачванні. Цяпер ён праходзіць у якасці сведкі.
11 жніўня трое хлапцоў былі жорстка затрыманыя па падазрэнні ва ўдзеле па трох крымінальных справах: нанясенні беларускамоўных графіці «Беларусь мае быць беларускай» і «Рэвалюцыя сьвядомасьці, яна ўжо ідзе…», а таксама закідванні фарбай білборда з выявамі супрацоўнікаў міліцыі. Беларускія праваабаронцы прызналі іх палітвязнямі. Напярэдадні выбараў Пякарскі і Жаромскі былі вызваленыя з турмы.
Каментары