Масавымі атручаннямі адзначыўся трэці этап Кубка свету па біятлоне, які праходзіць у славенскай Паклюцы. Як піша Еўрарадыё са спасылкай на championat.com, ахвярамі невядомага вірусу стала практычна ўся беларуская зборная.
Напярэдадні гонкі пераследу беларуская біятланістка Надзея Пісарава з'ехала ў лякарню ў Любляну. У дзень старту ў лякарню адправілася і Дар'я Юркевіч. Паводле папярэдніх звестак, у яе дыягнаставалі разрыў слізістай абалонкі страўніка. Лёгкую нямогласць адчула таксама і Надзея Скардзіна.
Падчас самой гонкі канадская біятланістка Меган Тандзі страціла прытомнасць і звалілася проста на адным са спускаў трасы. Трэнеры адвялі яе ў медпункт. Ад шпіталізацыі канадка адмовілася.
Паведамляецца, што ахвярамі віруснай эпідэміі сталі спартоўцы зборных Беларусі, Аўстрыі ды Канады, якія пражываюць у адным гатэлі. Прычым зборная Аўстрыі захварэла практычна поўным складам.
У гэтым жа гатэлі, дарэчы, пражывае і зборная Расіі. Але пра захворванні сярод іх пакуль не паведамляецца.
Цяпер чытаюць
Рыта Дакота ўпершыню распавяла, за што беларускія сілавікі схапілі яе маці ў 2022 годзе3
Каментары