Рух «За свабоду» падтрымае 36 чалавек на парламенцкіх выбарах
Папярэдні спіс кандыдатаў, падтрымку якім акажа рух «За Свабоду» на парламенцкіх выбарах 2016 года, быў зацверджаны 28 снежня на пасяджэнні рады арганізацыі.
У папярэдні спіс уваходзяць 36 прэтэндэнтаў, паведамляе прэс-служба руху «За Свабоду». Сярод іх — першы намеснік старшыні Юрый Губарэвіч, намеснік старшыні Алесь Лагвінец, члены рады арганізацыі Хрыстафор Жаляпаў з Віцебска, Дзяніс Турчаняк з Брэста, Андрэй Юркоў з Магілёўскай вобласці, Галіна Краўчанка з Гомеля, Юрый Меляшкевіч з Мінска і іншыя.
Губарэвіч адзначыў, што жаданне атрымаць заходнія крэдыты для выратавання эканомікі прымусіць беларускія ўлады перагледзець падыходы да арганізацыі выбарчых кампаній. «Наўрад ці можна сказаць, што выбары будуць поўнасцю сумленнымі і дэмакратычнымі, але магчымасцяў для працы з выбаршчыкамі і па прасоўванні сумеснага паслання павінна стаць больш», — лічыць ён.
Рух «За Свабоду» гатовы дапамагчы кандыдатам навучаннем, інфармацыйнай падтрымкай, а таксама падрыхтоўкай праграмных пасланняў.
Пры гэтым рада арганізацыі падтрымала працу сумесна з іншымі правацэнтрысцкімі структурамі (у прыватнасці, Аб'яднанай грамадзянскай партыяй і аргкамітэтам па стварэнні партыі «Беларуская хрысціянская дэмакратыя») па падрыхтоўцы агульнага спісу кандыдатаў на парламенцкіх выбарах і распрацоўцы агульнага паслання да выбаршчыкаў.
Цяпер чытаюць
Памятаеце былога памежніка, які стаў дальнабойшчыкам і ў Германіі прызнаваўся ў любові да Лукашэнкі? З ім бяда11
Каментары