Піша Уладзімір Падгол.
Прэзідэнт Уладзімір Пуцін падпісаў указ аб мерах па забеспячэнні эканамічнай бяспекі і нацыянальных інтарэсаў Расіі пры транзітных перавозках грузаў з Украіны ў Казахстан праз расейскую тэрыторыю. Тэкст апублікаваны на інтэрнэт-партале прававой інфармацыі.
«Международные транзитные автомобильные и железнодорожные перевозки грузов с территории Украины на территорию республики Казахстан через территорию РФ осуществляются только с территории Республики Белоруссия…»
Белоруссия — так Пуцін называе нашу рэспубліку, насуперак форме, замацаванай у беларускай Канстытуцыі. Раз Крамлю не ўдалося размясціць у нас авіябазу, то яны размясцілі на нас сваю назву, далі нашай Рэспубліцы мянушку па прынцыпе «Як самалёт назавеш, так ён і паляціць».
Цікава, каго Пуцін лічыць кіраўніком сваёй Беларусі? І якую дае яму мянушку? І не меней цікава як адрэагуе МЗС Беларусі і сам яе Уладар на падобнае перайменаванне?
Магчымыя наступныя варыянты рэакцый:
1) публічны пратэст МЗС Беларусі ў пісьмовай форме;
2) тэлефонны званок уладара Беларусі Пуціну з выказваннем пратэсту, пра званок: а) паведамляецца ў СМІ; б) не паведамляецца;
3) Пуцін дорыць Лукашэнку ваенны сучасны імянны самалёт з надпісам «Белоруссия».
Не менш цікавая рэакцыя на перайменаванне Беларусі лідараў грамадскай думкі і тых, хто называе сябе апазіцыяй.
Магчымыя варыянты:
1) не заўважылі;
2) выказалі пратэст: а) выйшлі да амбасады Расеі з лозунгамі, б) зрабілі пісьмовую заяву з пратэстам,
3) папярэдзілі народ і сусветную супольнасць аб падрыхтоўцы акупацыі па мадэлі анексіі Крыма.
Хутчэй за ўсё, рэакцыя Аляксандра Лукашэнкі і лідараў грамадскай думкі будзе як у прымаўцы «Хоць чыгунком называй, абы ў печ не ставіў».
Такая «гаршковая» стратэгія рэакцыі да імпэрскіх дзеянняў Расеі ўжо прывяла да страты палітычнага суверэнітэту (Саюзная дзяржава Беларусь-Расія), вайсковага суверэнітэту (Адзіная СПА і АДКБ), эканамічнага суверэнітэту (Еўразійскі эканамічны і мытны саюз). Людзі перасталі заўважаць адсутнасць мяжы з Расеяй, як не заўважае інвалід, што яму даўно ампутавалі нагу. Але ў таго хоць часам узнікаюць фантомныя болі.
Цікава, як у гэтым годзе ўладары Крамля будуць даціскаць А.Лукашэнку на чарговыя крокі па здачы суверэнітэту і як ён будзе супраціўляцца.
-
Фядута — Калеснікавай: Машанька, ці вярніцеся на Месяц, ці не вучыце жыць тых, хто стаміўся набіваць гузы ад чарговага наступання на граблі
-
Мінску трэба выдушыць з сябе правінцыйнасць і вярнуць нахабства і бляск Вялікага Горада
-
Каму яшчэ што можа стаць трэба «для нацыянальнай бяспекі» і як тут быць Беларусі
Каментары