Новы паўднёвы цыклон, які прыйдзе ў Беларусь у суботу, 16 студзеня, прынясе вялікія снегапады і па інтэнсіўнасці будзе падобны на цыклон «Даніэла», з якім краіна сутыкнулася ў мінулы аўторак. Пра гэта паведаміў начальнік службы гідраметэаралагічных прагнозаў Рэспубліканскага цэнтра па гідраметэаралогіі, кантролі радыеактыўнага забруджвання і маніторынгу навакольнага асяроддзя Дзмітрый Рабаў.
Паводле яго слоў, вышыня снежнага покрыва па краіне, як мяркуецца, павялічыцца на 10-15 см. Снег будзе ісці па ўсёй краіне, але цэнтр цыклона будзе знаходзіцца над Гомельскай вобласцю. «У суботу цыклон пачне змяшчацца з Карпацкіх гор на паўднёвы ўсход Беларусі і пойдзе на поўнач па ўсходзе краіны, таму і найбольш складаным надвор'е будзе на паўднёвым усходзе», — адзначыў сіноптык.
У гэты дзень у краіне плануецца аб'явіць аранжавы ўзровень небяспекі. «Такога ўраганнага ветру не будзе, як пры «Хаўеры» (цыклон 2013 года, які адносіцца да найвышэйшага, чырвонага, узроўню небяспекі), калі ён дасягаў 25 м/с, але ўсё роўна будзе мяцеліца і парывы да 14 м/с», — расказаў Рабаў.
На большай частцы Беларусі ў суботу чакаецца снег, мокры снег, у асобных раёнах месцамі моцны снег, мяцеліца, на дарогах снежныя заносы, па паўднёвым усходзе — наліпанне мокрага снегу і галалёд, парывісты вецер. Тэмпература паветра па краіне будзе кантрастнай — ноччу ад мінус 2°С па поўдні да мінус 15°С па поўначы, днём чакаецца ад 0 — мінус 2°С па поўдні да мінус 10°С па поўначы.
У Мінску таксама прагназуецца снег, раніцай і днём часам моцны, мяцеліца, парывісты вецер. Тэмпература ноччу мінус 6—8°С, днём мінус 4—6°С.
У нядзелю цыклон пачне сыходзіць у Цвярскую вобласць Расіі, яго ўплыў на Беларусь яшчэ захаваецца, але, паводле слоў сіноптыка, надвор'е «наладзіцца і будзе ўжо больш спакойным».
Найбольшыя цяжкасці, паводле слоў Рабава, умовы надвор'я створаць вадзіцелям і службам электразабеспячэння.
Спецыяліст таксама адзначыў, што ў новага цыклона пакуль няма назвы, бо імя прысвойваецца Свабодным інстытутам Берліна непасрэдна пасля ўтварэння цыклона. Мяркуецца, што цыклон з'явіцца на метэаралагічных картах у пятніцу.
Цяпер чытаюць
«Калі пасадзяць зноў, то пасяджу». Пачобут пра сваё вызваленне, камеры смяротнікаў, бітву за гонар у судзе і жаданне вярнуцца13
Каментары