Ва ўпраўленні Следчага камітэта па Мінску завершана расследаванне крымінальнай справы ў дачыненні да былога начальніка інспекцыі дэпартамента кантролю і нагляду за будаўніцтвам па Мінску.
Як паведаміў БелаПАН афіцыйны прадстаўнік УСК па Мінску Аляксандр Герасімаў, чыноўнік быў затрыманы ў снежні 2015 года на працоўным месцы з доказамі злачынства, пры атрыманні хабару.
Устаноўлена, што начальнік інспекцыі, абавязаны ажыццяўляць кантроль за ходам будаўніча-мантажных работ, якія праводзяцца на тэрыторыі горада, выкарыстоўваў службовыя паўнамоцтвы ў карыслівых мэтах. Чыноўнік такім чынам пабудаваў ўзаемаадносіны з заснавальнікам прыватнага прадпрыемства, які з'яўляецца генеральным падрадчыкам на будаўніцтве гандлёва-адміністрацыйнага комплексу, што апошні быў вымушаны даць хабар за атрыманне заключэння інспекцыі аб гатоўнасці аб'екта да прыёмкі ў эксплуатацыю. Пры гэтым падстаў, якія перашкаджаюць выдачы дакумента ва ўстаноўленым законам парадку, не мелася.
Незаконнае ўзнагароджанне ў суме 5 тыс. долараў ЗША перадавалася начальніку інспекцыі часткамі, у некалькі этапаў. Акрамя таго, заснавальнік будаўнічага прадпрыемства заплаціў каля 20 млн. рублёў за выраб мэблі ў кватэры жонкі атрымальніка хабару.
Дзеянні службовай асобы кваліфікаваныя па ч. 2 арт. 430 КК (атрыманне хабару ў буйным памеры). У ходзе расследавання да абвінавачанага была прыменена мера стрымання ў выглядзе заключэння пад варту.
Накладзены арышт на яго маёмасць у суме больш за 1,8 млрд. рублёў, у тым ліку кватэру, зямельны ўчастак з пабудовамі, аўтамабіль і грашовыя сродкі на рахунках у банкаўскіх установах.
Крымінальная справа перададзена пракурору для накіравання ў суд.
Цяпер чытаюць
Зяленскі назваў, якія рэтранслятары на мяжы і беларускія прадпрыемствы хвалююць Украіну36
Каментары