Электронныя таргі на пляцоўцы «БУТБ-Маёмасць» пройдуць не ўпершыню. Але гістарычныя будынкі з малатка прадаюць не так часта.
У гэты раз Уздзенскі раённы выканаўчы камітэт паспрабуе прадаць Крыжаўзвіжанскі касцёл ва Уздзе, пабудаваны яшчэ ў 1798 годзе расейскім генералам Казімірам Завішам. Касцёл аточаны каменнай агароджай з брамай, а ў пачатку ХХ стагоддзя да яго прыбудавалі цагляную апсіду.
У 1843 годзе ў гэтым храме хрысцілі Дамініка Луцэвіча - бацьку Янкі Купалы. Як і многія рэлігійныя будынкі, у савецкі час гэты архітэктурны помнік неагатычнага стылю быў перапрафіляваны ў раённы Дом культуры. У гэтым статусе ён і застаецца да гэтага часу.
Агульная плошча памяшканняў без скляпоў — 534 квадратныя метры. У будынку ёсць электрычнасць, ацяпленне, вадаправод і каналізацыя.
Захавалася адрэстаўраваная агароджа з уязной брамай з буту і чырвонай цэглы, а ў апсідзе цяпер размяшчаецца кацельня.
Будынак двухпавярховы. На першым паверсе будынка размешчаны глядзельная зала змяшчальнасцю 240 месцаў, гардэроб і складское памяшканне. На другім паверсе фае і 7 рабочых кабінетаў. Разам з будынкам пакупніку перадаецца ў арэнду на 99 гадоў зямельны ўчастак плошчай 0,3973 га.
Пачатковы кошт лота - 259 438 410 рублёў, ці крыху менш за 13 тысяч даляраў.
Дарэчы, мэтавае прызначэнне будынка змяняць можна — галоўнае, каб падчас рэканструкцыі ці рамонту быў захаваны яго знешні выгляд і «гісторыка-стылістычныя асаблівасці». Гэта значыць, пераможца таргоў зможа адкрыць там, напрыклад, кавярню, міні-гатэль, рэстаран або офісы. Пры змене мэтавага прызначэння будынка, каб выкарыстоўваць яго для размяшчэння адміністрацыйных, грамадскіх, гандлёвых, жылых, забаўляльных аб'ектаў, прадпрыемстваў па абслугоўванні насельніцтва і іншых вытворчасцяў, размяшчэнне якіх дапускаецца ў зоне жылой забудовы, можна будзе змяніць мэтавае прызначэнне і зямельнага ўчастка.
Таргі пройдуць 26 красавіка на пляцоўцы «БУТБ-Маёмасць».
Цяпер чытаюць
Дзядок расказаў, як паводзіў бы сябе ў сённяшняй Беларусі і што будзе далей4
Каментары