Марзалюк пытаўся Вакульчыка, ці будуць ствараць чорны спіс выкладчыкаў, якія праводзяць «ідэалагічную апрацоўку экстрэмісцкай скіраванасці»
«На гэты момант фарміраванняў экстрэмісцкай скіраванасці ў Беларусі не выяўлена», — заявіў 4 красавіка ў Савеце Рэспублікі Нацыянальнага сходу старшыня КДБ Валерый Вакульчык, адказваючы на пытанні парламентарыяў у працэсе абмеркавання законапраекта, у тым ліку які ўстанаўлівае крымінальную адказнасць за экстрэмісцкую дзейнасць.
«Разам з тым была выяўленая і папярэджаная дзейнасць падобных структур, якія маюць у сваёй дзейнасці прыкметы экстрэмісцкіх фармаванняў», — адзначыў кіраўнік КДБ.
У якасці прыкладу ён прывёў затрыманне і прыцягненне да крымінальнай адказнасці ў 2010—2012 гадах членаў анархісцкай групоўкі, якія выкарыстоўвалі «кактэйлі Молатава», прыцягненне да адміністрацыйнай адказнасці заснавальнікаў радыкальнай групоўкі, што распаўсюджвала прафашысцкія погляды ў інтэрнэце. «Члены групоўкі мелі сувязі з украінскімі аднадумцамі — удзельнікамі Майдану», — адзначыў Вакульчык.
Ён таксама сказаў аб «прыняцці папераджальна-прафілактычных мер у дачыненні да групоўкі мусульман», якія распаўсюджвалі радыкальныя рэлігійныя погляды і заклікалі да джыхаду. Да адміністрацыйнай адказнасці прыцягнутыя пяць грамадзян Беларусі, аднаму вынесенае афіцыйнае папярэджанне, сем замежных грамадзян дэпартаваныя з краіны.
Пры абмеркаванні законапраекта сенатар Ігар Марзалюк запытаў у старшыні КДБ, ці магчымае ў перспектыве «стварэнне банка звестак грамадзян нашай краіны, у першую чаргу інтэлектуальнай эліты, якія, карыстаючыся тым, што з'яўляюцца выкладчыкамі вышэйшай школы, працуючы з моладдзю», праводзяць «ідэалагічную апрацоўку экстрэмісцкай скіраванасці»? І ці магчымая забарона на прафесію для такіх асоб?
«У нас няма такіх прыкладаў, каб нехта з выкладчыкаў вышэйшай школы займаўся такой дзейнасцю», — запэўніў Вакульчык.
Цяпер чытаюць
Блогер Сярога з Расіі прыехаў на Зыбіцкую з каханай блогеркай Анечкай. Вынік: збіты ім беларус у коме, а Сярога на 5,5 года за кратамі32
Каментары