IX Міжнародны фестываль тэатраў лялек пройдзе ў Мінску з 13 па 17 мая, паведамілі ў Беларускім дзяржаўным тэатры лялек.
Маштабны форум, які праходзіць раз на два гады, адчыніць свае дзверы для ўсіх аматараў сапраўднага тэатральнага мастацтва. За пяць дзён мінчане і госці сталіцы ўбачаць 14 спектакляў. Найлепшыя калектывы Беларусі, Расіі, Украіны, Літвы, Польшчы, Ізраіля пакажуць сваю творчасць. А ўсяго за гады правядзення фестывалю Мінск наведала ўжо больш за 50 тэатраў з розных куткоў свету.
Сёлета арганізатары падораць гледачам магчымасць убачыць не толькі новыя, але і спектаклі, якія з'яўляюцца лаўрэатамі шматлікіх фестываляў і ўладальнікамі найвышэйшых тэатральных узнагарод. Напрыклад, у праграме форуму спектакль «Ваня» тэатра Karlsson Haus (лаўрэат найвышэйшай тэатральнай прэміі Санкт-Пецярбурга «Залаты сафіт», намінант расійскай Нацыянальнай тэатральнай прэміі і фестывалю «Залатая маска» 2016 году) і спектакль «Забіць Караля» Пензенскага абласнога тэатра «Лялечны дом» (чатыры разы лаўрэат расійскай Нацыянальнай тэатральнай прэміі «Залатая маска»).
Асаблівасць сёлетняга фестывалю — у разнастайнасці жанраў і формаў, а таксама ў шыраце прадстаўленых арганізацыйна-творчых структур. У фестывальнай праграме ўдзельнічаюць дзяржаўныя, акадэмічныя, а таксама прыватныя тэатры.
Усе беларускія калектывы прадставяць працы, створаныя за апошні час. У аснове большасці спектакляў — сусветная літаратурная класіка. Замежныя госці ў сваю чаргу падораць відовішчныя і вельмі кранальныя прадстаўленні для дзяцей. У тым, што тэатр лялек значна больш разнастайны за існуючыя пра яго ўяўленні, гледачоў пераканаюць спектаклі для дарослых.
Традыцыйна падчас фестывалю будуць праводзіцца майстар-класы і дыскусіі з гледачамі і крытыкамі. Таксама ўсіх чакае вечар тэатральнай музыкі «Лялечны рок-н-рол», праграма прадставіць кампазіцыі, напісаныя спецыяльна для тэатраў лялек.
Спектаклі форуму пройдуць на пяці пляцоўках горада — Беларускага дзяржаўнага тэатра лялек, Новага драматычнага тэатра, Беларускага рэспубліканскага тэатра юнага гледача, Беларускага дзяржаўнага маладзёжнага тэатра і малой сцэне Нацыянальнага акадэмічнага тэатра імя Янкі Купалы.
Арганізатары форуму — Міністэрства культуры, Мінгарвыканкам і Беларускі дзяржаўны тэатр лялек.
-
У Гомельскім драматычным тэатры — кадравыя чысткі. Зноў праз «палітыку»
-
«Будзе смешна і балюча»: «Купалаўцы» прэзентуюць заўтра новы спектакль. У галоўных ролях — Манаеў, Белахвосцік, Гарцуева
-
«Рашэнне прыйшло звонку». Што адбываецца ў віцебскім тэатры, дзе ў спектаклі прагучала «Жыве Фландрыя!» і пачалася чарада звальненняў?
Цяпер чытаюць
Прапагандысты запэўніваюць, што 196 палітвязняў ужо на свабодзе8
Каментары