«XXI стагоддзе, дзірка ў падлозе». Беларуску абурыў стан прыбіральні на аўтавакзале аднаго з райцэнтраў
У сацыяльнай сетцы Threads беларуска апублікавала відэа з грамадскага туалета на аўтавакзале ў Ельску і звярнула ўвагу на яго стан. Паводле яе слоў, падобны санвузел у райцэнтры існуе ўжо не адно дзесяцігоддзе, піша BG.Media.
Аўтарка відэа адзначыла, што людзі былі вымушаныя карыстацца такой прыбіральняй яшчэ як мінімум 40 гадоў таму, але нічога не змянілася і цяпер. Нават зімой пасажырам даводзіцца наведваць прыбіральню з адтулінай у падлозе. Жанчына заклікала распаўсюджваць публікацыю, каб прыцягнуць увагу мясцовых уладаў да праблемы.
Відэа выклікала негатыўную рэакцыю карыстальнікаў сацыяльнай сеткі. Многія ўзгадалі падобныя грамадскія туалеты ў іншых беларускіх гарадах. Адзін з каментатараў заўважыў, што стан грамадскіх прыбіральняў паказвае ўзровень развіцця цывілізацыі ў краіне.
Адна беларуска апублікавала кадры падобнай прыбіральні на вакзале ў Полацку. Яна падкрэсліла, што гаворка ідзе не пра закінуты аб’ект, а пра аўтавакзал у райцэнтры, якім карыстаюцца пасажыры.
Іншая карыстальніца параўнала ўбачанае з прыбіральняй у піянерскім лагеры «Лясная казка» ў Ждановічах, дзе, паводле яе слоў, яшчэ і выкарыстоўваюць шмат хлоркі.
Некаторыя ўзгадалі падобную сітуацыю на чыгуначнай станцыі Беларусь у Заслаўі. Адзін з каментатараў напісаў, што тамтэйшая прыбіральня такая ж, хоць у горадзе да свята «Дажынкі» абнавілі дарогі і тратуары, а таксама ўсталявалі помнікі і скульптуры. Іншы карыстальнік іранічна заўважыў, што ў будынках адміністрацый, судоў і пракуратуры прыбіральні, напэўна, значна камфортнейшыя.
Некаторыя каментатары жартавалі, прапануючы ладзіць экскурсіі ў стылі «Назад у СССР» або раілі лепш схадзіць у кусты, чым карыстацца такім туалетам.
Аднак былі і тыя, хто лічыў, што ў іншых месцах прыбіральні выглядаюць яшчэ горш. У якасці прыкладу згадвалі туалет каля могілак у мінскай Чыжоўцы і санвузел у мінскім наркалагічным дыспансеры на вуліцы Ваўпшасава.
Цяпер чытаюць
Дэпутатка, якая рыхтуе прыгажунь для Лукашэнкі, выйшла замуж8
Каментары