Вядучыя нямецкія спартоўцы запатрабавалі не дапускаць каманду Расіі да ўдзелу ў летняй Алімпіядзе 2016 года ў Рыа-дэ-Жанейра. Такім чынам яны адрэагавалі на новыя выкрыцці выпадкаў выкарыстання допінгу ў РФ пры падтрымцы дзяржавы, а таксама аб замене допінг-пробаў падчас зімовых Гульняў-2014 у Сочы, піша Deutsche Welle.
«Я выступаю за тое, каб ніводзін з расейцаў не мог узяць удзел у АГ-2016. Магчыма, адзін раз трэба паступіць так рэзка, каб гэта падзейнічала эфектыўна», — заявіў у суботу 14 мая газеце Bild лыжнік Фелікс Нойрайтэр (Felix Neureuther).
У такім жа ключы выказаліся таксама біятланіст Эрык Лесэр (Erik Lesser), барэц грэка-рымскага стылю Франк Штэблер (Franks Stäbler) і двухразовы чэмпіён Алімпіяды па хакеі на траве Морыц Фюрстэ (Moritz Fürste). Пры гэтым кідальнік дыска Робэрт Хартынг (Robert Harting) мяркуе, што атлеты зноў патрапілі ў «дурную сітуацыю», бо яны не могуць разлічваць на кампенсацыю прычыненай ім шкоды. Гімнаст Марсэль Нгуен (Marcel Nguyen) мяркуе, што «адхіленне цэлай краіны закране многіх невінаватых спартоўцаў».
Раней з заклікам адхіліць РФ ад Алімпіяды-2016 выступілі нямецкія спартыўныя функцыянеры.
Былы кіраўнік маскоўскай антыдопінгавай лабараторыі Рыгор Родчанкаў 13 мая распавёў пра ўжыванне допінгу расейскімі спартоўцамі і заклікаў Сусветнае антыдопінгавае агенцтва расследаваць шэраг выпадкаў. Пры гэтым ён заявіў, што з'яўляецца адзіным чалавекам, які можа паказаць, якія менавіта ўзоры былі падмененыя. Родчанкаў выказаў жаданне прысутнічаць пры праверцы проб і прапанаваў здымаць працэс на камеру, каб зрабіць яго «адкрытым для грамадскасці».
Каментары