«Прафесійны» безбілетнік збіў у Гомелі супрацоўніц кавярні за патрабаванне аплаціць рахунак
Гомельскі гарадскі аддзел Следчага камітэта завяршыў расследаванне крымінальнай справы па абвінавачанні 25-гадовага жыхара абласнога цэнтра ў збіцці дзвюх супрацоўніц кавярні.
Як паведаміла афіцыйны прадстаўнік УСК па Гомельскай вобласці Марыя Крываногава, два месяцы таму пара павячэрала ў адной з гомельскіх устаноў, зрабіўшы заказ на суму больш за 400 тысяч рублёў. Перад закрыццём кавярні, калі прыйшоў час разлічвацца, наведвальнікі праігнаравалі просьбы аб аплаце і хуткім крокам выйшлі на вуліцу.
«Менеджар і афіцыянтка выбеглі ўслед за імі. За вуглом суседняга будынка ўдзельнікі канфлікту спыніліся. У адказ на патрабаванні супрацоўніц аплаціць рахунак мужчына пачаў іх збіваць. Супрацьпраўныя дзеянні нецвярозага гамяльчаніна спынілі трое наведвальнікаў кавярні. Грамадзяне ўтрымлівалі мужчыну да прыезду супрацоўнікаў міліцыі», — адзначыла прадстаўніца СК.
У бальніцы ў менеджара дыягнаставалі страсенне галаўнога мозгу і множныя ўдары мяккіх тканак, у афіцыянткі — пералом вялікага пальца на правай кісці.
Дзеянні абвінавачванага кваліфікаваныя следствам па ч. 2 арт. 339 Крымінальнага кодэкса (наўмысныя дзеянні, якія груба парушаюць грамадскі парадак і выказваюць відавочную непавагу да грамадства, суправаджаюцца прымяненнем насілля з прычыненнем менш цяжкага цялеснага пашкоджання).
Раней жыхар Гомеля двойчы прыцягваўся да крымінальнай адказнасці за злоснае хуліганства і шмат разоў — да адміністрацыйнай, у тым ліку больш за 30 разоў за безбілетны праезд.
Што за чамадан носіць каля Лукашэнкі ягоны ахоўнік? Не, там не ядзерная кнопка20
Каментары