Экс-кандыдат у прэзідэнты Таццяна Караткевіч вырашыла выйсці з Беларускай сацыял-дэмакратычнай партыі (Грамада), у якой яна была з 2000 года. У каментары TUT.BY яна патлумачыла сваё рашэнне, у першую чаргу, тым, што ўзначальвае іншую структуру — кампанію «Гавары праўду».
— Рашэнне звязана са змяненнем майго статусу, ужо больш за паўгода я сустаршыня іншай арганізацыі. Для мяне прынцыпова, і для фарміравання новай каманды, важна быць сумленнай, празрыстай, зразумелай, каб усе бачылі, што ўзначальваю адну арганізацыю.
Па словах Караткевіч, у яе застаецца шмат сяброў у БСДП (Грамада) і яна плануе працягваць працаваць разам з імі.
На пытанне, ці звязана гэта рашэнне палітыка з тым, што кіраўніцтва яе ўласнай партыі вырашыла не падтрымліваць яе на прэзідэнцкіх выбарах, Караткевіч адказала:
— Кіраўніцтва партыі даўно дэманструе сваю прыхільнасць быць фармалістамі. Гэта прывяло апазіцыю да кадравага і ідэалагічнаму крызісу. Патрэбныя новыя падыходы, патрэбна такая арганізацыя як у нас у «Гавары праўду».
Па словах палітыка, у яе структуры ёсць культура дыялогу, а сама «Гавары праўду» настроеная на працу з грамадствам.
Лідар БСДП (Грамада) Ірына Вештард адзначыла, што Таццяна Караткевіч, ужо падаючы дакументы на рэгістрацыю кандыдатам у парламент, не паказала, што знаходзіцца ў партыі.
— Чалавек абавязкова павінен вызначыцца, дзе ён, з кім ён і як ён дзейнічае. Чалавек мае права быць у партыі, ці ня быць. Я гэта ўспрымаю нармальна, без усялякага ляманту, станоўчых ці адмоўных момантаў. Я не маю ніякага намеру яе права адбіраць.
БСДП (Грамада) сабрала амаль 20 тысяч подпісаў у падтрымку Караткевіч на прэзідэнцкіх выбарах, але потым вырашыла выйсці з кампаніі. Па гэтым шляху пайшлі і астатнія структуры кааліцыі «Народны рэферэндум» — партыя БНФ і рух «За свабоду». Пасля прэзідэнцкіх выбараў кампанія «Народны рэферэндум» была згорнутая.
Каментары