Напярэдадні дня выбараў дэпутатаў Палаты прадстаўнікоў незалежнага кандыдата па Каліноўскай акрузе № 108 Віктара Кулака пазбавілі акрэдытацыі.
У пятніцу, 9 верасня, Віктар распавёў «Нашай Ніве», што на ўчастак №637, які месціцца ў Цэнтры грэка-рымскай барацьбы, масава зганяюць студэнтаў. У дадатак камісія падае завышаную колькасць галасоў.
У суботу, 10 верасня, старшыня гэтай участковай камісіі Анатоль Шабельнік пазбавіў яго акрэдытацыі.
«Я хацеў сфатаграфаваць запячатаную скрыню, але як толькі дастаў фотаапарат, каб гэта зрабіць, старшыня камісіі сказаў, што пазбаўляе мяне акрэдытацыі, — распавядае Віктар Кулак. — Раней ён папярэджваў, што так і зробіць, калі я паспрабую сфатаграфаваць скрыню. Аднак паводле Выбарчага кодэксу выбары павінны праводзіцца свабодна і галосна».
Перад гэтым назіральнік сустрэўся з прадстаўнікамі АБСЕ і паведаміў ім пра ўсе заўважаныя ім парушэнні. Ён заклікаў іх паўплываць на тое, каб была праведзеная праверка і выбары на гэтым участку прызналі несапраўднымі.
«Акрамя гэтага, ёсць і яшчэ адно парушэнне. Я запытаўся ў старшыні камісіі Анатоля Шабельніка, ці было праведзена паседжанне па разглядзе маёй скаргі з апісаннем заўважаных парушэнняў, якую я ім падаў. У адказ прагучала, што старшыня разгледзеў яе сам, без паседжання. Гэта таксама супярэчыць заканадаўству і паказвае яго некампетэнтнасць», — дадаў назіральнік.
Цяпер ён мае намер звярнуцца ў ЦВК і пракуратуру.
Цяпер чытаюць
Бедны, расчараваны — асабліва ў родных — і нікому непатрэбны. Злы дзённік Барадуліна дазваляе зазірнуць унутр генія19
Каментары