Нарвегія не будзе дарыць Фінляндыі гару Халці ў знак сяброўства на 100-годдзе стварэння Фінляндскай Рэспублікі, заявіла прэм'ер-міністр Нарвегіі Эрна Сульберг.
Ініцыятыва падарыць Фінляндыі вяршыню 1361-метровай гары зыходзіла ад групы нарвежцаў. Яны тлумачылі сваю ідэю тым, што частка гары, якая знаходзіцца на мяжы паміж краінамі, усё роўна належыць Фінляндыі і пры гэтым з'яўляецца самай высокай кропкай гэтай краіны.
Калі б мяжу пасунулі на 150 метраў на поўнач, і на 200 — на захад, то найвышэйшай кропкай Фінляндыі аказалася б рэальная горная вяршыня, а не ўчастак схілу, як цяпер, прыводзяць свае аргументы прыхільнікі ідэі падарыць гару.
Аднак, па словах Сульберг, змяненне мяжы паміж краінамі пацягнула б за сабой вельмі складаныя праблемы юрыдычнага кшталту. Акрамя таго, ідэя супярэчыць канстытуцыі Нарвегіі, у першым артыкуле якой напісана, што Нарвегія не будзе па добрай волі саступаць сваю тэрыторыю.
«Гэта прапанова вельмі добра была ўспрынятая публікай», — адзначыла міністр. Сапраўды, прапанова набрала 17 тысяч подпісаў у сацсетках.
«Але мы прыдумаем іншы годны падарунак на стагоддзе Фінляндыі», — сказала на заканчэнне міністр.
Фінляндыя стала незалежнай дзяржавай і дэмакратычнай рэспублікай 6 снежня 1917 года, да гэтага яна была часткай Расійскай імперыі.
Каментары