Па просьбах ветэранаў і камуністаў каля МТЗ паставяць помнік Леніну
Да гадавіны Кастрычніцкай рэвалюцыі каля МТЗ паставяць помнік Леніну. З такой просьбай да кіраўніцтва прадпрыемства звярнуліся «ветэраны і камуністы». Раней помнік знаходзіўся ва ўнутраным двары завода.
Апошні месяц помнік рэстаўруецца. Да 7 лістапада яго ўсталююць на тэрыторыі сквера, побач з МТЗ-2, там, дзе ён стаяў у савецкія гады.
«Помнік часта перафарбоўвалі: то ў шэры, то ў зялёны, і цяпер мы яго чысцім, робім новы пастамент», — распавёў Андрэй Сусленка, намеснік гендырэктара ААТ «МТЗ» па ідэалогіі, кадрах і сацразвіцці.
Ён удакладніў, што кіраўніцтва завода прыняло рашэнне выставіць помнік за тэрыторыю завода пасля зваротаў «ветэранаў і камуністаў».
«Нам казалі, што хутка свята, але няма куды кветкі адносіць. Пасля абмеркавання мы вырашылі ўсталяваць помнік на першапачатковым месцы. Цяпер любы грамадзянін можа яго ўбачыць, а не толькі рабочыя», — дадаў Сусленка.
Помнік Леніну каля МТЗ будзе адкрыты а 13-й гадзіне 7 лістапада падчас свята, якое арганізуе завод.
Завадская газета «Беларус-МТЗ» правяла апытанне сярод рабочых пра стаўленне да помніка. Невядома, ці былі крытычныя каментары, але ў друк яны не патрапілі.
«Помнік — гэта памяць пра былыя часы, пра гісторыю завода і нашу маладосць. Яго проста немагчыма адсюль прыбраць, бо разам з тым мы знішчым нашу гісторыю», — лічыць Наталля з аддзела галоўнага метролага.
«Людзі старэйшага пакалення ўсё жыццё пражылі з гэтым імем пачынаючы са школьнай лавы, Ленін быў для нас сімвалам будучыні, мы спадзяваліся на лепшае», — прыводзіць газета словы Анатоля з рамонтна-механічнага цэха.
«Помнік выклікае толькі станоўчыя эмоцыі, хай стаіць яшчэ шмат гадоў», — сказаў журналісту Сяргей Уладзіміравіч, вядучы інжынер-электронік.
Бяляцкі: Не трэба спяшацца адмяняць санкцыі. Бо гэта будзе ўспрынята рэжымам як яго перамога і слабасць Еўропы15
Каментары