Дзеючы міністр абароны ЗША Эштан Картэр заявіў, што ЗША павінны падтрымліваць магчымасці для супрацоўніцтва з Расіяй па тых кірунках, дзе інтарэсы дзвюх краін супадаюць, але пры гэтым паабяцаў, што Вашынгтон будзе заўсёды абараняць сваіх саюзнікаў і гатовы да доўгага супрацьстаяння з Масквой.
«Усё, што робяць Злучаныя Штаты, як самастойна, так і ў складзе НАТА, гарантуе, што мы працягнем супрацьстаяць расійскай агрэсіі і мы гатовыя да працяглага суперніцтва», — заявіў Картэр на форуме па бяспецы ў Каліфорніі, паведамляе РБК са спасылкай на CNN.
«Мы не імкнёмся бачыць у Расіі ворага. Але не варта цешыць сябе, мы будзем абараняць нашых саюзнікаў, светапарадак, заснаваны на цвёрдых прынцыпах, і светлую будучыню, якую ён нам усім забяспечвае», — удакладніў кіраўнік Пентагона.
Картэр выказаў упэўненасць, што НАТА і ў будучыні будзе мець вырашальнае значэнне для забеспячэння калектыўнай абароны перад тварам як новых пагроз, так і тых, што вярнуліся з мінулага. Ён ахарактарызаваў дзеянні Расіі ў Сірыі як контрпрадуктыўныя, а таксама абвінаваціў Маскву ў нагнятанні ядзернай пагрозы і агрэсіўных намераў у дачыненні да Украіны і краін Прыбалтыкі.
Ён яшчэ раз павіншаваў генерала Джэймса Мэціса з выбарам яго кандыдатуры на пасаду міністра абароны ў адміністрацыі Дональда Трампа і пацвердзіў гатоўнасць забяспечыць плыўны пераход улады ў ведамстве. Раней кіраўнік Пентагона афіцыйна заяўляў, што вельмі высока цэніць заслугі і прафесійныя якасці Мэціса.
У ходзе перадвыбарчай кампаніі абраны прэзідэнт ЗША Дональд Трамп неаднаразова крытыкаваў дзеянні саюзнікаў па НАТА і абяцаў пераглядзець адносіны з імі. «Альбо яны нам выплацяць усё, што недаплацілі раней, альбо хай вымятаюцца», — сказаў падчас аднаго з выступаў Трамп. «Калі НАТА разваліцца, то хай разваліцца», — дадаў ён тады.
У ліпені 2016 года Дональд Трамп таксама заявіў, што не ўпэўнены ў тым, што гатовы аўтаматычна падаўжаць гарантыі для саюзнікаў. Ён сказаў, што ЗША будуць «прыкрываць спіны» сваіх саюзнікаў па НАТА, толькі «калі яны выконваюць свае абавязацельствы» ў адносінах да ЗША.
Цяпер чытаюць
Хто тая беларуска, якую экстрадавалі ў ЗША для суда за кантрабанду дэталяў для самалётаў6
Каментары