«Гэтыя аб'екты былі асуджаныя». Чаму наступствы балістыкі па лагістычных цэнтрах пад Кіевам такія цяжкія

Прэм'ер-міністр Украіны Сяргей Карэцкі запэўніў, што ўрад

«распрацуе неабходныя рашэнні для забеспячэння бесперапыннай працы лагістычных кампаній і гандлёвых прадпрыемстваў у адказ на расійскі ракетны тэрор».

Гэтай ноччу ніводную з 28 балістычных ракет украінскай СПА збіць не ўдалося. Украіна не мае неабходных ракет, здатных збіваць балістыку.

У той жа час у апошнія месяцы Украіна наносіць удары дронамі па расійскай лагістыцы. Не стала выключэннем і ноч 5 жніўня.

Цяперашні абмен ударамі па лагістыцы змусіў украінскія кампаніі і ўрад думаць пра тое, як абараніць бізнэс і зрабіць недасягальнымі для балістыкі склады і іншую лагістычную інфраструктуру.

«Эпіцэнтр». Аднаўленню не падлягае

Паводле даных кампаніі «Эпіцэнтр», гэтай ноччу расіяне «адначасова паразілі два ключавыя лагістычныя комплексы кампаніі»: у Кіеве цалкам згарэў лагістычны цэнтр, які быў адным з ключавых аб'ектаў, у Калінаўцы Браварскага раёна — лагістычна-вытворчы комплекс. Там загінуў адзін супрацоўнік кампаніі, яшчэ трое параненыя і трапілі ў бальніцу.

Акрамя таго, у выніку прамых ракетных удараў знішчаныя два вялікія складскія комплексы. Яшчэ адна ракета трапіла ў завод Epicentr Ceramic Corporation, які вырабляе керамічную плітку.

«Магутны выбух фактычна зруйнаваў завод, зрабіўшы далейшую працу прадпрыемства немагчымай. Вытворчасць на заводзе цалкам прыпыненая», — гаворыцца ў заяве «Эпіцэнтра».

Паводле папярэдніх ацэнак, поўнае аднаўленне зруйнаванай вытворчасці запатрабуе каля двух гадоў.

Павялічыць

«Новая Пошта». Знішчаны сартавальны цэнтр

«У ноч на 5 жніўня ў выніку масаванай варожай атакі знішчаны сартавальны цэнтр «Новай пошты» ў Кіеве. Трое людзей загінулі, 8 параненыя», — заявілі ў кампаніі.

Гэты паштовы аператар зазнаваў атакі дзясяткі разоў, асабліва ў 2026 годзе. Аднак «Новая пошта» не прыпыняла працу.

«Цяпер працягваецца ацэнка наступстваў варожай атакі. «Новая пошта» кампенсуе кліентам поўную абвешчаную каштоўнасць пашкоджаных адпраўленняў і звяжацца з кожным, каб паведаміць дэталі кампенсацыі», — запэўніваюць у кампаніі.

Актуальны статус адпраўленняў і іх трэкінг паштовы аператар раіць шукаць у мабільным дадатку або на афіцыйным сайце кампаніі.

Павялічыць

«Разетка». Тры ракеты па размеркавальным цэнтры

Тры балістычныя ракеты знішчылі найбольшы размеркавальны складскі комплекс «Разеткі» ў Браварскім раёне. Пра гэта ў фэйсбуку паведаміла сузаснавальніца кампаніі Ірына Чачоткіна.

«Тут мы апрацоўвалі больш за 100 тысяч заказаў на дзень. Ён не падлягае аднаўленню», — напісала яна.

Лагістычны комплекс адкрылі ў пачатку 2017 года. Ён быў найбольшым і найбольш аўтаматызаваным складам кампаніі, кажа Ірына.

Найбольшы лагістычны цэнтр і іншыя аб'екты

У вёсцы Чайкі Бучанскага раёна быў знішчаны адзін з найбольшых складскіх лагістычных комплексаў ва Украіне — «Чайка», які належыць кампаніі Alfa Development Group (ADG).

Паводле даных «Forbes-Украіна», ADG з'яўляецца лідарам рынку Украіны, маючы больш за 500 тысяч квадратных метраў складской нерухомасці.

Яго кліентамі з'яўляюцца дзясяткі вядомых кампаній, таму можна выказаць здагадку, што знішчэнне велізарнага хаба азначае і страту тавару дзясяткаў кампаній, якія арандавалі там склады.

Кіраўнік Браварскай раённай адміністрацыі Віталь Бягун у эфіры тэлемарафону паведаміў, што ў Браварскім раёне увогуле атрымалі пашкоджанні каля пяці лагістычных аб'ектаў, у тым ліку склады кампаній Fozzy і Fozzy Food.

У Кіеве на Баршчагоўцы гарэлі і былі моцна пашкоджаныя склады сеткі супермаркетаў Novus.

Цярпелі таксама ад пажараў два размеркавальныя цэнтры сеткі «Сільпо» ў Кіеўскай вобласці.

Павялічыць

У «Сільпо» паведамляюць пра шасцёра загінулых работнікаў.

Цэнтральны склад прадукцыі нямецкай кампаніі LIQUI MOLY ва Украіне гэтай ноччу быў цалкам знішчаны агнём. Кампанія вырабляе алівы, змазку і аўтахімію.

Называюцца толькі тыя аб'екты, адносна якіх удалося знайсці афіцыйныя пацвярджэнні. Кружаць назвы таксама іншых лагістычных цэнтраў, размешчаных у сталіцы і вакол яе, але афіцыйных заяў пра зруйнаванні пакуль няма. Іх таксама называе ў сваёй справаздачы міністэрства абароны РФ.

Заявы мінабароны Расіі

Расійскае вайсковае ведамства называе два сур'ёзныя транспартна-лагістычныя цэнтры — «Рабен Украіна» і «Транс-лагістык», назвы якіх не фігуруюць у іншых справаздачах.

Акрамя таго, ДСНС паведамляе пра маштабныя пажары на лагістычных аб'ектах у Браварскім раёне, дзе — сярод іншых — размешчаныя і гэтыя дзве кампаніі.

«Транс-лагістык» з'яўляецца адным з найбольшых ва Украіне прыватных аператараў міжнародных і міжгародніх аўтамабільных грузавых перавозак.

«Рабен Украіна» — вялікі лагістычны вузел і размеркавальны комплекс еўрапейскага аператара, які ўваходзіць у склад нідэрландскай Raben Group. Ва Украіне кампанія працуе з 2003 года.

Мінабароны РФ сцвярджае, што на ўсіх гэтых аб'ектах нібыта захоўваліся камплектуючыя для дронаў, тавары падвойнага прызначэння або вырабляліся беспілотнікі.

Вялікі склад — вялікі пажар

У апошнія месяцы Украіна і Расія наносяць удары па лагістычнай інфраструктуры адна адной.

На працягу апошніх двух тыдняў УСУ нанеслі ўдары па каля 20 лагістычных комплексах па ўсёй Расіі. З іх палова знішчаная, сцвярджае ўкраінская ўлада.

Тады, калі балістычныя ракеты ляцелі ўначы на інфраструктуру Кіеўшчыны, украінскія дроны нішчылі адзін з найбольшых лагістычных хабаў у Тульскай вобласці.

Павялічыць

Уладзімір Зяленскі неаднаразова заяўляў пра атакі на лагістычныя цэнтры, у тым ліку сеткі Wildberries. Прэзідэнт Украіны сцвярджаў, што гэтыя цэнтры «задзейнічаныя ў забеспячэнні расійскай арміі камплектуючымі для дронаў, навігацыйнага абсталявання».

Бяспрэцэдэнтныя ўдары мінулай ночы змусілі ўкраінскія кампаніі і ўрад думаць пра тое, як абараніць бізнэс і зрабіць недасягальнымі для балістыкі склады і іншую лагістычную інфраструктуру.

«Вялікі склад — вялікі пажар. Іншых варыянтаў няма. Не хочаце вялікага пажару — развозьце па сотнях маленькіх складоў і рабіце падземныя сховішчы. Хлопцы не маглі не разумець, што гэтыя аб'екты асуджаныя», — так каментуе ў фэйсбуку апошнія ўдары па ўкраінскіх лагістычных цэнтрах вайсковы блогер з псеўданімам Паала Люм'ерэ.

Паводле яго слоў, некаторыя бізнэсы ўжо «дэмантуюць каштоўнае абсталяванне і развозяць тавар са сваіх велізарных ангараў».

«Эпіцэнтр» паабяцаў, што дзеля бесперапыннасці паставак знішчанага завода керамікі «вытворчасць будзе перанесеная на два прадпрыемствы кампаніі за мяжой».

Аднак такія меры выглядаюць як паасобныя. Кіраўнік урада Карэцкі паабяцаў падумаць пра супольныя з бізнэсам меры для бесперапыннай працы лагістычных кампаній і гандлёвых прадпрыемстваў, нягледзячы на сур'ёзныя страты.

«Вораг паказаў, што яму няма розніцы, што атакаваць. Атакуюцца склады з прадуктамі, з будаўнічымі матэрыяламі, рытэйл, вытворчасць. І так будзе і надалей, на жаль, пакуль у ворага ёсць балістыка», — кажа дарадца прэзідэнта Украіны Сяргей «Флэш» Бяскрэстнаў.

Паводле яго ацэнак, можа ісці гаворка пра 100 балістычных ракет штомесяц, якія УСУ не могуць збіваць праз недахоп неабходных сродкаў.

«Флэш» перакананы, што вораг будзе шукаць такія склады і надалей, каб стварыць дэфіцыт тавараў і ўплываць на эканоміку Украіны.

Ён заклікаў бізнэсменаў «дыверсіфікаваць рызыкі» — не прыцягваць увагу ворага і здраднікаў ва Украіне да вялікага трафіку, перабудаваць каналы лагістыкі.

«Вялікіх складоў часова не павінна быць. Гэта пытанне выжывання. Атак будзе больш», — падсумоўвае Сяргей Бяскрэстнаў.

• 1
• 0
• 5
• 1
• 1
• 10
• 7
• 0