Расійскі апазіцыянер Аляксей Навальны мае намер правесці «нармальны» рэферэндум у акупаваным РФ Крыме ў выпадку сваёй перамогі на прэзідэнцкіх выбарах у Расіі. Пра гэта ён распавёў у інтэрв'ю РБК.
Нагадаем, на днях Аляксей Навальны абвясціў пра свой удзел у выбарах прэзідэнта Расіі і пачаў прэзідэнцкую кампанію.
На пытанне аб тым, што адбылося з Крымам, — гэта гістарычная справядлівасць ці анексія, Навальны адказаў наступным чынам:
«Калі вас пытаюцца: «Як вас завуць?» — вы можаце адказаць на пытанне «так» або «не»? Так і тут. Калі вы задаяце складанае пытанне, на яго нельга даць простага адказу. І ў гэтым заключаецца трагедыя Крыма, які цяпер незразумела чыя тэрыторыя. Але я магу сказаць, што шлях вырашэння праблем Крыма павінен пачынацца з нармальнага рэферэндуму, які там трэба правесці».
«Гэта непрызнаная тэрыторыя. Для таго, каб пачаць вырашаць гэтыя праблемы, мы павінны мець нейкі пункт, ад якога мусім адштурхоўвацца, і гэтым пунктам павінна стаць высвятленне рэальнага волевыяўлення жыхароў Крыма на самым сумленным і самым празрыстым рэферэндуме», — заявіў палітык.
На ўдакладняючае пытанне: «То бок гэта не гістарычная справядлівасць і не анексія?», Навальны адзначыў:
«Ды не існуе ніякай гістарычнай справядлівасці. Сёння гістарычная справядлівасць адна, а заўтра гістарычная справядлівасць іншая. Для крымчукоў гэта адно, для крымскіх татараў — гэта ўсё зусім іншае».
Каментары