Паліцыя Турцыі арыштавала 12 чалавек па падазрэнні ў дачыненні да нападу на начны клуб у Стамбуле ў навагоднюю ноч. Пошук нападніка працягваецца, паведамляе BBC.
Віцэ-прэм'ер Турцыі Нуман Куртулмуш заявіў, што ў паліцыі ёсць адбіткі пальцаў і апісанне нападніка.
Чыноўнік паабяцаў, што асоба таго, хто страляў, будзе ўстаноўлена ў бліжэйшы час.
«Мы спадзяемся не толькі знайсці тэрарыста, але і ўстанавіць яго сувязі і людзей, якія аказвалі яму падтрымку звонку і ўнутры клуба», — заявіў Куртулмуш.
У ноч на першае студзеня невядомы адкрыў стральбу ў начным клубе. У выніку 39 чалавек загінулі і каля 70 атрымалі раненні.
Паліцыя Турцыі апублікавала відэа і фота чалавека, які, па іх дадзеных, і з'яўляецца нападнікам. У МУС не ўдакладнілі, дзе і калі былі знятыя гэтыя кадры.
Турэцкія СМІ са спасылкай на свае крыніцы ў паліцыі сцвярджаюць, што нападнік мог быць з Узбекістана або Кіргізіі.
Улады цяпер спрабуюць зразумець, ці звязаны той, хто напаў на клуб, з тымі, хто зладзіў стральбу і выбух у аэрапорце імя Атацюрка ў ліпені.
Лічыцца, што за ліпеньскім нападам стаіць экстрэмісцкая групоўка «Ісламская дзяржава».
Гэтая ж групоўка ўзяла на сябе адказнасць і за страляніну ў начным клубе.
Раней лідары ІД заклікалі сваіх прыхільнікаў здзяйсняць напады на Турцыю праз яе ўдзел у ваеннай аперацыі ў Сірыі.
Турцыя ўдзельнічае ў баях на тэрыторыі Сірыі са жніўня, праводзіць аперацыі супраць ІД і курдскіх фармаванняў.
Улады Турцыі ўжо заявілі, што працягнуць ваенную кампанію ў Сірыі.
Стральба і перапрананне
Сталі вядомыя і некаторыя падрабязнасці нападу на начны клуб.
Паведамляецца, што нападнік прыехаў да клубу на таксі, а затым дастаў аўтамат з багажніка машыны.
Ён забіў паліцэйскага і турагента, што стаялі на ўваходзе, і зайшоў у будынак. Унутры клуба ў той момант знаходзілася па меншай меры 400 чалавек. Нападнік вёў стральбу на працягу сямі хвілін, выпусціўшы больш за сотню патронаў.
Затым, як паведамляюць у паліцыі, ён пераапрануўся і знік у натоўпе.
Большасць забітых падчас нападу — замежнікі.
Падчас нападу былі забітыя:
- 11 грамадзян Турцыі
- 7 грамадзян Саудаўскай Аравіі
- 3 грамадзяніна Ірака
- 3 грамадзяніна Лівана
- па 2 грамадзяніна Іардана, Індыі і Марока
- па адным грамадзяніну Германіі, Сірыі, Туніса, Бельгіі, Кувейта, Канады і Расіі, а таксама адзін чалавек з падвойным грамадзянствам Туніса і Францыі
- яшчэ адно цела не апазнана
Цяпер чытаюць
Дзеячы эміграцыі пасварыліся з нагоды спісаў запрошаных на прыём да прэзідэнта Польшчы48
Каментары