Марзалюк, Гайдукевіч, Дзермант, Шпакоўскі жорстка крытыкуюць Дэкрэт №3: «Сыры, недапрацаваны, прыпыніць дзеянне»
Чарговая перадача «Справа прынцыпу» на тэлеканале АНТ была прысвечаная тэме Дэкрэта №3 аб так званых «дармаедах». Характэрна, што абсалютна ўсе запрошаныя эксперты крытыкавалі дзеянне гэтага дакумента. Амаль усе сышліся ў меркаванні, што ідэя была правільнай, а вось выкананне падкачала.
«Дэкрэт быў накіраваны на вывад ценявога бізнэсу на паверхню. Тыя, хто будуюць вялікія дамы, ездзяць на добрых машынах, але ніяк не ўдзельнічаюць у сацыяльным жыцці краіны. А атрымалася ўсё дакладна наадварот, — з ходу пачаў намеснік старшыні ЛДПБ Алег Гайдукевіч. — Пацярпелі звычайныя людзі. Я хачу сказаць пра віну выканаўцаў. Па ўсіх абласцях абы-як арганізаваная праца. Пайшла масавая рассылка грамадзянам, якія не маюць ніякага дачынення да гэтага дэкрэту. Гэта закранула людзей, якіх скарацілі на вытворчасці. Як атрымалася, мы хацелі пакараць самых багатых — а пакаралі самых бедных. У Брэсце выйшлі людзі, дык там старшыня гарвыканкама выйшаў да людзей, а да гэтага ж ніводзін чыноўнік не выходзіў».
«Прынцып нармальны. Мы сапраўды хацелі пакараць гэтым дэкрэтам тых, хто займаецца ценявым бізнэсам. Мы ж сутыкнуліся з нізкай выканаўчай дысцыплінай. Не было ніякай работы, — сказаў дэпутат-гісторык з Магілёва Ігар Марзалюк. — Міністэрства, якое распрацоўвала дэкрэт, павінна было займацца тлумачальнай працай. У Брэсце такі «ліст шчасця» прыходзіў былому начальніку РУУС — гэта што? Маці студэнта МГІМА прыходзіць ліст, што сын «дармаед», і яна павінна даказваць нешта — гэта што?»
«Не трэба ацэньваць замысел, трэба судзіць выкананне. Гладка было на паперы, але забыліся пра яры. Дакумент сыры, непрапрацаваны. Яго дзеянне на сённяшні момант немэтазгодна, дэкрэт павінен быць прыпынены», — сказаў палітычны аглядальнік Аляксандр Шпакоўскі, які нядаўна стаў героем скандалу.
Прарасійскі публіцыст Аляксей Дзермант сказаў, што ў свеце часта ўводзяць «падатак на раскошу», у нас жа ўсё зрабілі наадварот.
Таксама лёгкая крытыка прагучала ад дэпутатаў Палаты прадстаўнікоў Валерыя Барадзені і Ігара Камароўскага. Усе эксперты пагадзіліся, што дакумент непрапрацаваны.
Пры гэтым Марзалюк, Гігін, Гайдукевіч і Дзермант накінуліся на тых, хто ўзначальвае пратэсты. «Дэструктыўныя сілы», называлі іх.
Каментары