Андрусь Горват напісаў адкрыты ліст Лукашэнку: Вас больш ніхто не баіцца
Дарагі таварыш Аляксандр Рыгоравіч!
От захацеў напісаць вам ліст. Я напішу спакойна. Я, разумееце, два дні працаваў рукамі і паспакайнеў. Разважлівым стаў.
Аляксандр Рыгоравіч, маю для вас паганаю навіну — савецкай Беларусі больш няма. Яна скончылася. Разумееце, скончылася.
Вы ніколі не былі ў Прудку (і дзякуй богу!), а я вам раскажу, што чую ад прудкаўцоў цяпер. Яны гавораць:
— Няхай мяне пасадзяць, а я болей маўчаць не буду.
Не баяцца.
Гэта не інтэлігенцыя і не атмарозкі (так вы нас ласкава называеце). Гэта даяркі і трактарысты. Газаэлектразваршчыкі. Механізатары. Вас, таварыш, больш ніхто не баіцца.
Вы можаце паказаць яшчэ сто мільёнаў сваіх нквдэшнікаў, але баяцца іх ужо ніхто не будзе. Ведаеце чаму? Таму што савецкіх беларусаў больш няма. Цяпер у нас ёсць воля. Свабоду вы можаце забраць, а волю — не. Нам, ведаеце, болей не трэба пракладаць тратуары, з якіх нельга збочыць.
Дарагі таварыш Аляксандр Рыгоравіч, прашу перадаць прывітанне вашаму паплечніку таварышу Давыдзьку. А разам з прывітаннем скажыце, што нават за 300 кіламетраў ад МКАДа ніхто не верыць тэлевізару. Калі цётка-пенсіянерка, у якой нават старонкі ў аднакласніках няма, гаворыць, што чытае навіны на «Свабодзе», я разумею, што не толькі савецкая Беларусь скончылася, а і ваш Давыдзька скончыўся таксама. Усё, разумееце? Усё. Цёткі глядзяць на беларускіх баевікоў, якімі вы пужаеце, і шкадуюць іх. Разумееце? Шкадуюць.
Шкадуем.
Уся ваша сістэма прапаганды, БРСМы, суботнікі, начальніцы ідэалогіі з прычоскай «гняздо» — гэта смецце, якое трапіла ў зубчатыя колы гістарычнага працэсу. Яно — смецце — стрымлівала гістарычны працэс. Але зубчатыя колы змалолі яго ў пыл. Ну добра, яшчэ не змалолі, але гэта ўжо не спыніць.
Вы бачыце, я спакойна пішу. Не нярвуюся, не дзёргаюся. Гэта таму, што ў мяне тут цёплая сонечная раніца. Спакойнае надвор’е. Я спакойны — надвор’е спакойнае.
Я не палітык і нават не рэвалюцыянер. Наадварот — я ўнутранай эміграцыяй займаўся. Мне не важна, хто працуе прэзідэнтам. Няхай хоць вы. Але тут разумееце якая штука? Тут вам трэба выбіраць: альбо вы з намі, альбо мы без вас.
Ціханоўская і Зяленскі ўпершыню правялі сустрэчу. Зяленскі запрасіў Святлану ў Кіеў14
Каментары