Кіраўнік МЗС Польшчы: Фінансавая падтрымка «Белсата» будзе меншай, але дастатковай, каб выжыць
Кіраўнік польскага МЗС Вітольд Вашчыкоўскі паведаміў, што міністэрства не перастане фінансаваць тэлеканал «Белсат», аднак аб'ёмы падтрымкі стануць меншымі. Пра гэта Вашчыкоўскі заявіў у інтэрв'ю газеце Rzeczpospolita.
«Я не маю нічога агульнага з «Белсатам», акрамя таго, што я адзін з іх донараў. Мы працягнем падтрымку. Яна будзе меншай, але дастатковай для таго, каб выжыць», — сказаў міністр.
Па словах кіраўніка ведамства, палякі, якія жывуць у Беларусі, просяць трансляваць TVP Polonia і TVP «Культура», а не «Белсат».
«У нас ёсць вельмі супярэчлівыя звесткі пра ўплыў тэлеканала «Белсат» на беларускае грамадства. Падтрымка грамадзянскай супольнасці можа ажыццяўляцца па-іншаму і больш эфектыўна», — сказаў ён.
Аб магчымым скарачэнні фінансавання польскім МЗС тэлеканала «Белсат» ад 17 да 5 млн злотых паведамілі ў канцы мінулага года. Па словах дырэктара тэлеканала, гэта б прывяло да знішчэння тэлеканала. Беларуская грамадзянская супольнасць і дзеячы культуры, у тым ліку нобелеўская лаўрэатка Святлана Алексіевіч, выступілі ў падтрымку «Белсату». У сацыяльных сетках запусцілі хэштэг #белсатжыві. У Мінску прайшла акцыя апазіцыі з заклікам да беларускіх уладаў узяць фінансаванне тэлеканала на сябе. 5 студзеня прэм'ер-міністр Польшчы Бэата Шыдла запэўніла дырэктара тэлеканала, што яму нічога не пагражае і фінансаванне будзе працягнута.
Цяпер чытаюць
«На караблі кожны дзень — панядзелак». Беларуска расказала пра сваю працу на круізным лайнеры7
Каментары