Інфармацыю пра перанос тэрмінаў на два гады ён назваў фэйкам.
Будаўніцтва сталічнай падземкі ідзе строга па графіку, заявіў старшыня Мінгарвыканкама Уладзімір Кухараў у эфіры тэлеканала «Беларусь 1». Інфармацыю пра перанос тэрмінаў на два гады ён назваў фэйкам, піша Tochka.by.
Будаўніцтва другой чаргі трэцяй, Зялёналужскай лініі метро плануюць завяршыць у 2028 годзе.
Гэтая ветка закране плошчу Бангалор і пройдзе да вуліцы Мельнікайце [будзе тры станцыі: «Парк Дружбы народаў», «Камароўская» і «Пярэспа»]. Цяпер вядзецца будаўніцтва трох станцый на гэтым участку.
«Мы закупілі другі тунэлепраходчы комплекс, які ўжо працуе пад зямлёй. Гэта значна паскарае працэсы. Мы можам паралельна працаваць над пракладкай тунэляў. Мы таксама спрасцілі пытанні вынасу сетак. Цяпер гэта дасць сур’ёзны вынік у паскарэнні тэмпаў», — адзначыў кіраўнік горада.
Паводле яго слоў, у 2027 годзе плануецца пачатак будаўніцтва чацвёртай, кальцавой лініі метро. Яна дазволіць значна палепшыць транспартную лагістыку ў межах падземкі і абслугоўваць значна большую колькасць пасажыраў.
Цікава, што афіцыйная газета «Беларусь сёння» ў канцы жніўня пісала, што завяршэнне другой чаргі плануецца да 2030 года.
Каментары