AFP
Міністэрства абароны Расіі заявіла, што спыняе ўзаемадзеянне са Злучанымі Штатамі ў рамках мемарандума аб прадухіленні інцыдэнтаў у небе над Сірыяй пасля таго, як сілы кааліцыі, якую ўзначальваюць ЗША, збілі сірыйскі знішчальнік.
У ведамстве таксама прыгразілі, што зараз любыя паветраныя аб'екты, уключаючы самалёты і беспілотныя апараты міжнароднай кааліцыі, выяўленыя на захад ад ракі Еўфрат, «будуць прымацца на суправаджэнне» ў якасці паветраных цэляў.
У мінабароны таксама назвалі дзеянні ЗША ў Сірыі ваеннай агрэсіяй.
За дзень да гэтага ўрад Сірыі паведаміў, што сілы міжнароднай кааліцыі збілі ваенны самалёт сірыйскіх ваенна-паветраных сіл. Паведамляецца, што інцыдэнт адбыўся непадалёк ад горада Эс-Саура ў правінцыі Рака.
Дамаск заяўляе, што самалёт выконваў баявое заданне супраць экстрэмісцкай групоўкі «Ісламская дзяржава». У сірыйскай заяве гаворыцца, што гэта будзе мець небяспечныя наступствы ў справе барацьбы з тэрарызмам.
У сваю чаргу амерыканскія вайскоўцы сцвярджаюць, што сірыйскі ваенны самалёт скінуў бомбы непадалёк ад атрада паўстанцаў, якіх падтрымлівае Амерыка, пасля чаго і быў збіты самалётам ВПС ЗША.