Суд у цэнтральным Кітаі пастанавіў выплаціць прадстаўніку ЛГБТ кампенсацыю за прымусовае «лячэнне ад гомасэксуалізму» і прынесці яму прабачэнні, паведамляе ВВС.
Пазоўнік па прозвішчы Ю звярнуўся ў суд пасля таго, як яго жонка і сваякі ў 2015 годзе адправілі яго на прымусовае лячэнне ў псіхіятрычную лякарню горада Чжумадзянь правінцыі Хэнань.
На працягу 19 дзён у шпіталі яму рабілі ін'екцыі і давалі таблеткі.
Згодна з рашэннем суда, прымусовае змяшчэнне ў псіхіятрычную бальніцу з'яўляецца парушэннем правоў грамадзяніна, калі ён не ўяўляў пагрозы для грамадства.
У маі суд запатрабаваў, каб псіхіятрычная бальніца, у якой Ю быў пастаўлены дыягназ «парушэнне сэксуальных пераваг», апублікавала ў адной з мясцовых газет прабачэнні перад Ю і заплаціла яму кампенсацыю ў памеры 735 даляраў.
У 2014 годзе актывіст Пэн Яньхуэй, які абараняе правы геяў, прайшоў лячэнне ў прыватнай псіхіятрычнай клініцы, каб атрымаць інфармацыю аб «лячэнні гомасэксуалізму» з дапамогай электрашоку. Пра гэты спосаб лячэння гаварылася ў рэкламе клінікі.
Пазней актывіст звярнуўся ў суд з пазовам да клінікі, запатрабаваўшы кампенсацыю за здзекі, якія яму давялося перанесці ў ходзе «лячэння». Суд пастанавіў выплаціць актывісту 500 даляраў у якасці кампенсацыі. Таксама па патрабаванні суда рэклама клінікі была знятая.
Да 2001 года гомасэксуалізм у Кітаі разглядаўся як псіхіятрычнае захворванне, якое неабходна лячыць. Нягледзячы на тое, што ў некаторых гарадах, такіх як Шанхай, праводзяцца гей-парады і фестывалі, стаўленне да гэтай з'явы ў Кітаі застаецца даволі кансерватыўным.
Паводле даных праваабаронцаў, мільёны геяў з-за ціску з боку сваякоў і грамадства аддаюць перавагу ўступаць у гетэрасексуальныя шлюбы, чым адкрыта заяўляць аб сваёй сэксуальнай арыентацыі.
У маі ўлады Кітая заблакавалі працу мабільнага дадатку для знаёмства геяў і лесбіянак.
У 2016 годзе кітайскі суд адхіліў пазоў двух жыхароў горада Чанша на паўднёва-усходзе Кітая да мясцовых уладаў, якія адмовіліся зарэгістраваць іх аднаполы шлюб. Гэта была першая ў КНР спроба ўзаконіць гомасексуальны саюз. Паводле кітайскіх законаў шлюб заключаецца паміж мужам і жонкай, аднак у тэксце не пазначана, што муж абавязкова павінен быць мужчынам, а жонка— жанчынай.
У гадавіну смерці Жанны Фрыске Дзмітрый Шэпелеў распавёў, чаму не дазваляе сыну бачыцца з яе сваякамі16
Каментары