Памятаеце Рокі з дыснееўскага мульціка «Чып і Дэйл», які вельмі любіў «сыыыыыыр»? Мае адносіны з сырам можна апісаць прыкладна гэтак жа. Сёння ў нас ёсць магчымасць пакаштаваць розныя яго гатункі, пра якія ў недалёкім мінулым даводзілася толькі чуць. А гэта адкрывае перад аматарамі сыру неабсяжныя гарызонты смакаў.
Прапаную два варыянты гарачых закусак з сырамі, якія ў многіх яшчэ выклікаюць насцярожанасць — гэта сыры з так званай «шляхетнай цвіллю». Ідэальныя да пасядзелак з віном — а часам такой стравай можна і на сняданак сябе, любімых, пабалаваць.
Запечаны камамбер
Камамбер — гэта мяккі тлусты сыр з каровінага малака, звонку пакрыты пухнатай белай скарыначкай з цвілі. Я не вельмі яго разумела, пакуль аднойчы не вычытала, што найлепш падаваць яго ў запечаным выглядзе. З таго часу я перакананая, што камамбер сапраўды варта есці толькі так.
Базавы рэцэпт вельмі просты: верхнюю скарынку трэба надрэзаць у выглядзе сетачкі, папырскаць аліўкавым алеем і запячы ў духоўцы 15 хвілін на 180°С. А далей працуе ваша фантазія: падаваць можна з мёдам, ягадным соусам (найчасцей робяць бруснічны ці журавінавы), свежай садавіной, арэхамі…
Тут я запякла сыр са свежым размарынам, а ў форму паклала кавалачкі мяккай чабаты, якія пасля запякання сталі хрумсткімі і выдатна надаліся да мачання ў гарачую цягучую сырную сярэдзінку. Пакаштуйце — не адарвацца!
Грушы, запечаныя з блакітным сырам і арэхамі
Блакітны сыр, арэхі і грушы — гэта проста наркатычнае спалучэнне. І не кажыце потым, што я вас не папярэджвала! Існуе шмат гатункаў сыру з блакітнай цвіллю — ракфор, гарганзола, дарблю і іншыя. Я пакуль не вялікі спецыяліст, але з тых, што давялося каштаваць, найбольш люблю данаблю, мне здаецца, у яго самы гарманічны смак.
Для гэтай закускі трэба ачысціць грушы, разрэзаць іх напалам і выняць костачкі, зрабіўшы паглыбленне для начынкі. Сыр раскрышыць, арэхі дробна парэзаць (найлепш узяць грэцкія, можна міндаль, кедравыя, тут у мяне лясныя). У палову начынкі я дадала яшчэ дробна парэзаныя сушаныя журавіны, лыжачку мёду і кроплю каньяку. Начынку выкласці ў грушы, грушы — у форму, і паставіць у разагрэтую да 180°С духоўку хвілін на 30 (грушы павінны стаць мяккімі).
Варыяцый тут таксама шмат: можна замяніць арэхі беконам, альбо зрабіць вінны соус, альбо… Ну, вы зразумелі: уключайце фантазію і шукайце тое спалучэнне смакаў, якое будзе найлепшым асабіста для вас. Натхнення на кухні!
Гатуйце таксама:
- Макавыя сырнікі ў духоўцы
- Духмянае яблычнае печыва
- Кошычкі з яблыкамі і швейцарскай мерэнгай
- Бліны з сырам і зелянінай
- Аладкі з яблыкамі
- Гарбузовы кекс з яблыкамі, журавінамі і арэхамі
- Два ВІДЭАрэцэпты гарачых і халодных бутэрбродаў
- Печыва з журавінамі
- Яблычны кекс з сырам
Што запісана афіцыйнай прычынай смерці адзінага сына Ярмошынай?7
Каментары