Пра яго расказвае берасцейскі сайт prosvit.org.
Украінцы знялі 30-серыйную карціну «#Школа», які распавядае пра адносіны падлеткаў, іх настаўнікаў і бацькоў. Адметнасць серыяла — усе персанажы гавораць на ўкраінскай мове.
У інтэрнэце з'явілася ўжо больш за палову серый. Трэба сказаць, сюжэт не тое каб закручаны, акцёры можа не такія прафесійныя, як у прывычных ужо для нас амерыканскіх і скандынаўскіх серыялах. І ўсё ж аўтары спрабуюць брацца за вельмі няпростыя, важныя праблемы: гвалт у сям'і, падлеткавыя самагубствы, аб'юз (а папросту — цкаванне, здзекі) з боку аднагодкаў. Вядома, гэта ўсё праз праблемы любові, адносін, рэўнасці, узаемадапамогі як у дарослым, так і ў падлеткавым калектывах.
Можа, формай гэты серыял падобны да аналагічнай расійскай прадукцыі, але па сутнасці ўсё ж адрозніваецца. Цяжка ўявіць сабе, каб у расійскім серыяле нехта ў дзяржаўных органах сістэматычна браў хабар ці, напрыклад, каб паказвалі бяздзейнасць паліцыі. У сцэнарыстаў «#Школы» відавочна няма ілюзій адносна рэальнасці, але ёсць спадзяванні.
Не ўсе акцёры аднолькава прафесійныя, праўда, з серыі ў серыю граюць усё лепш, калі не з першай серыі, то з трэцяй у іх ігру пачынаеш верыць. Найбольш прафесійна, па-мойму, выглядаюць дырэктар школы (мудры, спакойны) і галоўная сцерва серыяла, завучыха Дар'я Пятроўна (з якой, як з часам аказваецца, не ўсё так адназначна). Тым больш я была здзіўленая, калі выявіла, што выканаўца ролі галоўнай ліхадзейкі — вельмі мілая актрыса Алена Курта, заснавальніца дабрачыннага фонду, мэта якога — зрабіць ўкраінцаў шчаслівай нацыяй (менавіта так!) праз рэформы ў розных сферах.
Два словы пра саўндтрэк серыяла. Гэта новая песня гурту «Антыцелы», і яна сапраўды проста неймаверная. А кліп на гэтую песню раздзірае душу. У аснову пакладзена гісторыя савецкага акіянолага Станіслава Курылава. Ён марыў паглядзець свет, а саветы не выпускалі яго з краіны. Ужо страціўшы надзею, ён даведаўся пра круізны лайнер, які ідзе з Уладзівастока да экватара і назад без заходу ў парты іншых дзяржаў.
Так у адважнага акіянолага з'явіўся план. 13 снежня 1974 Курылаў скочыў за борт. 100 кіламетраў праплыў за два дні — без сну, ежы і пітва. Выплыў на Філіпінах. Збег! Можна толькі ўявіць, што рабілася ў Маскве, калі пра гэта стала вядома.
«О-о-о, нічога не бойся, у канцы сцэнара хэпі-энд». Гэта настолькі натхнёны прыклад барацьбы за сваю свабоду і годнасць! У кліпе адважнага ўцекача сыграў Алег Лысагор — украінскі гонар, шматразовы чэмпіён свету па плаванні.
Цяпер чытаюць
Галыгіна прымусілі апраўдвацца за зварот да сілавікоў у 2020-м2
Галыгіна прымусілі апраўдвацца за зварот да сілавікоў у 2020-м
«Вайна ўсё спіша». Беларускім удзельнікам гей-прайда ў Вільні пагражалі расправай ад імя беларускіх ваяроў за выкарыстанне бела-чырвона-белага сцяга219219
Каментары