4 красавіка 2018 года а 17-ай гадзіне ў Рэспубліканскай мастацкай галерэі Беларускага саюза мастакоў (Палац мастацтва, вул. Казлова, 3) адбудзецца прэзентацыя выставы «Код: 25.03.2018».
Выстава адбудзецца ў межах святочных мерапрыемстваў, прысвечаных 100-годдзю абвяшчэння Беларускай Народный Рэспублікі. Фармат выставы прадугледжвае самы шырокі спектр сучасных выяўленчых сродкаў без абмежавання часу стварэння твораў.
Сімвалічна, што назва выставы ўтрымлівае ў сабе вельмі пашыраны і актуальны ў наш час тэрмін. У абагуленым сэнсе «код» — уваходныя дадзеныя, якія прадстаўляюць пэўную інфармацыю для счытвання ў зручным і зразумелым для атрымальніка выглядзе. Апрача таго, з шэрагу яго вызначэнняў, «код» — камбінацыя лічбаў і літар, што пазначае пэўны аб'ект дзеля адрознення яго ад іншых падобных аб'ектаў. У навуцы добра вядомае паняцце «генетычнага коду» — паслядоўнасці запісу клеткавай інфармацыі, якая дазваляе нам існаваць менавіта ў выглядзе чалавека. У культуры «код» — таксама зашыфраваная ў нейкай форме інфармацыя, што ідэнтыфікуе культуру як унікальную. Культурны код вызначае набор выяў, якія злучаны з якім-небудзь комплексам стэрэатыпаў у свядомасці. Але збольшага «код» — гэта культурнае несвядомае. Не тое, што здаецца ці выразна ўсведамляецца, а тое, што прыхавана ад разумення, але выяўляецца ва ўчынках. Культурны код нацыі дапамагае разумець рэфлексіі яго носьбітаў.
Для калектыўнага несвядомага нашай нацыі 25.03.2018 — гэта зусім не шараговая паслядоўнасць лічбаў на календары. Гэта ключавы код да ўспамінаў пра тыя драматычныя падзеі, што ў сакавіку 1918 года запусцілі незваротны працэс, вынікам якога і сталася існаванне на сучаснай мапе свету дзяржавы Рэспубліка Беларусь.
У выставе, якая прапануецца гледачу, беларускія мастакі розных пакаленняў прадэманструюць, што мары і ідэалы заснавальнікаў Беларускай Народнай Рэспублікі і сёння, быццам паходня, асвятляюць іх шлях, матывуючы на стварэнне твораў, якія, аддаючы належную даніну павагі гераізму і самахвярнасці бацькоў-заснавальнікаў БНР, не толькі адлюстроўваюць у той ці іншай форме падзеі стогадовай даўніны, але па свайму зместу з’яўляюцца актуальнымі развагамі мастакоў аб складанасцях часу, яго новых сэнсах і выкліках, будучым лёсе нашай краіны.
Тэрмін правядзення выставы:
з 4 па 15 красавіка 2018 года, штодзень з 11.00 да 19.00.
Тэлефоны для даведак:
(017) 288-15-49, (017) 290-60-10 — Рэспубліканская мастацкая галерэя (Палац мастацтва)
(017) 296-67-84 — Беларускі саюз мастакоў.
Каментары