Дэпутат Палаты прадстаўнікоў Ганна Канапацкая здымае сваю кандыдатуру на пасаду старшыні Аб'яднанай грамадзянскай партыі, выбары якога адбудуцца на з'ездзе партыі 8 ліпеня. Пра гэта яна паведаміла на сваёй старонцы ў фэйсбуку.
Пра намер балатавацца ў старшыні АГП яна абвясціла паўгода таму.
«На парадку дня нашай партыі павінна стаяць сістэмная, структурная перазагрузка. Для яе ажыццяўлення патрабуецца штодзённая карпатлівая праца на працягу некалькіх гадоў. Сумяшчэнне дэпутацкай працы ў Палаце прадстаўнікоў з рэалізацыяй маёй абноўленай праграмы рэформаў АГП не ўяўляецца магчымым.
Таксама мною прынята рашэнне сканцэнтраваць максімум намаганняў на падрыхтоўцы да парламенцкіх і прэзідэнцкіх выбараў, якія пройдуць у 2019 і 2020 гг.», — напісала Канапацкая.
З'езд АГП пройдзе ў нядзелю, 8 ліпеня. Пра намер балатавацца заявілі Анатоль Лябедзька, Васіль Палякоў і Мікалай Казлоў.
Каментары