Гатуем таматны суп — адзін з самых папулярных у Польшчы
Мінулы раз, калі я адпачывала на польскім узбярэжжы Балтыйскага мора, я была трохі здзіўлена, што ў кожнай кавярні заўсёды можна было замовіць памідорны суп. Толькі потым я даведалася, што zupa pomidorowa лічыцца адным з самых папулярных супоў у Польшчы.
І тое не дзіўна, бо гатуецца ён вельмі лёгка, і яго можна проста разнастайніць — напрыклад, выбраць не булён з гародніны, а курыны ці дадаць да супу прыгатаваны рыс замест локшыны. Але што застаецца нязменным, дык гэта насычаны кіславаты смак памідораў і вяршковасць смятаны.
Нам спатрэбіцца:
- 1 морквіна
- 1 цыбуліна
- кавалак сельдэрэю таўшчынёй 2 см
- 2 лаўровыя лісткі
- 3—5 зярнятак духмянага перцу
- слоік кансерваваных таматаў
- 150 мл смятаны
- 50 гр. сухой локшыны ці вермішэлі
- пятрушка
- соль, перац
Спачатку варым булён. У 1,5 літра вады кладзём парэзаныя кавалкамі цыбулю, моркву і сельдэрэй. Дадаём спецыі. Варым гародніну хвілін 20—30 да мяккасці.
Дадаём да булёна таматы. Можна пакінуць агародніну кавалкамі, але мне больш падабаецца аднароднасць супу, таму я пюрырую яго блэндарам. Даём супу закіпець.
Наступным інгрэдыентам дадаём смятану — для гэтага размешваем смятану з некалькімі лыжкамі супу і патроху выліваем у рондаль.
Напрыканцы дадаём локшыну і варым да мяккасці (хвілін 5—7). Солім і перчым суп. Перад падачай пасыпаем суп свежай пятрушкай.
Смачна есці!
Цяпер чытаюць
65‑гадовага гамельчука асудзілі за спробу дыверсіі на чыгунцы і здраду дзяржаве. Што вядома?2
Каментары