Сумесны канцэрт беларускага гусляра Алеся Чумакова («Стары Ольса», «Ceilidh Ceol») і электроннага этна-фолк гурта PAWA адбудзецца на пляцоўцы менскага клуба «Бруге» 30 мая. Спецыяльны госць мерапрыемства — гурт «Апошні Шылінг».
Канцэрт будзе складацца з дзвюх частак.
У першай Алесь Чумакоў прэзентуе альбом «Праўда ў віне».
Таксама прагучаць сусветныя і айчынныя хіты на гуслях і ірландскія карчомныя песні ў беларускай імправізацыі. Зайграе таксама спецыяльны госць, гурт «Апошні Шылінг». Яго праграма ўключае як «стандарты» ірландскай і шатландскай музычных традыцый, так і шэраг аўтарскіх кампазіцый.
Алесь Чумакоў — майстар-гусляр, вядомы шырокай публіцы як музыка гурта «Стары Ольса» і лідар праекта Ceilidh Ceol. Пазнавальны вакаліст і інструменталіст, ён паспяхова адкрыў сябе ў сольнай творчасці і праз удалую апрацоўку сярэднявечных беларускіх народных баладаў і ваярскіх песень працягнуў адраджэнне і сучаснае ўдасканальванне старажытнай традыцыі гуслярства.
Чумакоў можа надаць новае старажытнае гучанне і творам ХХ стагоддзя. Такім, як класіка «Песняроў» і NRM.
У другой частцы канцэрта выступіць электронны этна-фолк гурт PAWA.
Ён выконвае традыцыйную беларускую і еўрапейскую музыку, але робіць гэта нязвыклым чынам. У музычным арсенале калектыва сярэднявечныя інструменты — дуда, жалейка, дудкі і скрыпка — суседнічаюць з драм-машынамі, сінтэзатарамі і электрагітарай.
Яшчэ выступ PAWA — выдатная магчымасць навучыцца беларускім танцам і песням і падсілкавацца шалёнай энэргетыкай і пазітывам на падмурку векавых традыцый!
PAWA неаднаразова вылучаліся незвычайнымі, драйвовымі праектамі. Напрыклад, у мінулым годзе разам з опернымі спевакамі Іллёй Сільчуковым і Вольгай Вашкевіч PAWA запісалі беларускі кавер на песню «Я свободен» — адну з самых вядомых кампазіцый Валерыя Кіпелава.
Таксама гурт PAWA адзначыўся запамінальным выступам на пляцоўцы «Мінск-Арэна» ў падтрымку хакейнага клуба «Дынама-Мінск».
Сумесны канцэрт Алеся Чумакова і гурта PAWA пройдзе 30 мая ў клубе «Бруге» (пр. Партызанскі, 6А). Пачатак а 19-й.
Кошт квіткоў ад 15 да 25 рублёў.
Першым 100, хто набудзе квіток папярэдне — дыск Testamentum Terrae «Angleza» на ўваходзе ў падарунак!
Прыватнае прадпрыемства «Канцэрт Анлайн». УНП 192400162
Цяпер чытаюць
Лукашэнка знайшоў незвычайныя словы для спачування Хаменеі: «вераломная атака»7
Каментары