У Нямеччыне пацыентка клінікі, якая 27 гадоў знаходзілася ў коме, прыйшла ў поўную прытомнасць. Пра гэта паведамляе Daily Mail.
Жыхарка ААЭ Муніра Абдула атрымала чэрапна-мазгавую траўму ў ДТЗ у 1991 годзе, калі ў яе машыну недалёка ад горада Аль-Айн урэзаўся школьны аўтобус. У аўтамабілі таксама знаходзіўся яе сын Амар Вэбер. Маці выратавала яго, закрыўшы сабой. У хлопчыка былі толькі лёгкія траўмы.
Муніру шпіталізавалі ў мясцовую бальніцу, затым перавялі ў Лондан, каб паставіць дыягназ. Дактары адзначалі, што жанчына знаходзіцца ў мінімальнай свядомасці — стане, падобным на кому, пры якім захоўваецца ўспрымальнасць да болю. Пазней яе вярнулі ў ААЭ, дзе шмат гадоў кармілі праз трубку і праводзілі фізіятэрапію.
У 2017 годзе наследны прынц Абу-Дабі Махамед бен Заід даведаўся пра сітуацыю сям'і Абдула і аплаціў лячэнне Муніры ў Германіі. Праз год Муніра пачала прамаўляць некаторыя гукі, а яшчэ праз некалькі дзён прачнулася і сказала імя свайго сына.
Жанчына вярнулася ў Абу-Дабі разам з сям'ёй і працягвае аднаўляцца. Ёй неабходная фізіятэрапія для лячэння атрафіі цягліц.
Каментары