«Там горка». Мінабароны патлумачыла, чаму танкі раскатваюць новы асфальт на праспектах без гумовых накладак
Некалькі месяцаў таму на праспекце Незалежнасці ў Мінску памянялі асфальт: рыхтаваліся да Еўрапейскіх гульняў.
Выглядае, што хутка яго зноў давядзецца перакладваць, бо цяжкая тэхніка, якая рыхтуецца да парада і праедзе па сталіцы 3 ліпеня, ушчэнт псуе пакрыццё.
Нават у суседняй Расіі, з падобным культам мілітарыстычнага фетышызму, маштаб праблемы спрабуюць зменшыць спецыяльнымі гумовымі накладкамі на гусеніцы танкаў.
Чаму так не робяць у Беларусі, хоць ужо мінула некалькі год, як прадстаўнікі Мінабароны абяцалі «вырашыць пытанне»?
Пра гэта «Нашай Ніве» са спасылкай на спецыялістаў па ўзбраенні расказала прэс-сакратарка міністра абароны Наталля Гаўрусік.
«У накладак ёсць такая канструктыўная ўласцівасць: яны могуць выкарыстоўвацца на вельмі малой хуткасці. Умоўна, да 15 кіламетраў на гадзіну. Гэта тая хуткасць, з якой калона ідзе перад трыбунамі. Але калі калоне трэба выязджаць ад трыбун, ёй трэба паскорыцца да 50 км/г. А там (за стэлай «Мінск — горад-герой» — «НН») акурат яшчэ троху ў горачку падняцца, каб не стала ўвогуле ўся калона. На такой хуткасці башмакі будуць злятаць, гэта небяспечна. Таму яны і не выкарыстоўваюцца», — патлумачыла яна.
Каментары