На асфальтабетонных заводах наракаюць на нізкую якасць бітуму з Мазыра — рэха паставак няякаснай нафты?
Як стала вядома «Нашай Ніве», прынамсі на адным буйным асфальтавым заводзе ўзніклі праблемы з якасцю бітуму, які пастаўляе Мазырскі НПЗ.
Пра гэта паведамілі супрацоўнікі сярэдняга звяна.
Яны схільныя звязваць гэта з тым, што менавіта ў Мазыр ішла кепская нафта з Расіі: маўляў, вось на «Нафтане» такой праблемы няма, бо той брудную нафту прымаць не стаў, і блізкі да яго Нафтабітумны завод яе таксама не атрымліваў.
Тут трэба сказаць, што якасць бітуму вызначаецца па некалькіх характарыстыках, галоўная з якіх — пенетрацыя, яна дазваляе вызначыць цвёрдасць бітуму. Калі казаць пра дарожную спецыфіку, то чым больш — тым лепш, бо ў будаўнічых, ізаляцыйных і іншых бітумах свае крытэрыі якасці.
Сэнс атрыманай намі інфармацыі ў тым, што пры замове з Мазыра бітуму маркі «70/100» (у назве маркі другой лічбай адразу і пазначаецца пенетрацыя) прыйшло невядома што.
Маўляў, бітум быў кепскі і візуальна, і па паху. Таму было вырашана адправіць яго на экспертызу ў адзін з дзяржаўных інстытутаў. Адказ пацвердзіў падазрэнні — па асноўнай характарыстыцы якасць бітуму была далёкай ад дэклараванай.
А чаму бітум з нізкай пенетрацыяй — гэта кепска?
Лічыцца, што марка «50/70» (да якой бліжэй за ўсё пастаўлены на завод бітум) горай праяўляе сябе ў будучыні — дарога з такога асфальту больш схільная да расколін зімой.
Крыніцы «Нашай Нівы» выказалі здагадку, што кепская нафта тут можа быць ні пры чым.
Маўляў, нядаўна Мазырскі НПЗ знайшоў агента ў Румыніі, куды пачаў пастаўляць бітум.
Але румыны замаўляюць не «70/100», а бітум ніжэйшай якасці.
Пры гэтым, сцвярджаюць крыніцы, бітум для паставак на розныя заводы замешваецца ў адной ёмкасці. Ачысціць яе цалкам ад «папярэдняга» бітуму немагчыма, таму ў выніку наступная партыя перамешваецца з рэшткамі бітуму ніжэйшай якасці — і выходзіць такая сітуацыя.
На заводзе такое рэзка адмаўляюць.
«У нас ніякіх праблем няма! Усё ў адпаведнасці з інструкцыямі, а пашпарты выпісваюцца толькі на якасныя нафтапрадукты! Калі ёсць доказы, хай кампанія з дакументамі гэтымі звернецца да нас у вызначаным парадку», — адказаў «Нашай Ніве» адзін з кіраўнікоў Мазырскага НПЗ.
Адметна, што пакрыўджаны бок так рабіць, выглядае, не будзе — работнікі кажуць, што вышэйшыя менеджары баяцца апублічваць інфармацыю, каб не псаваць адносіны з дзяржаўным пастаўшчыком.
Варта сказаць, што з такой праблемай сутыкнуўся пакуль што толькі адзін завод з абзвоненых намі. Але там экспертыз не праводзілі: кажуць, што давяраюць пастаўшчыку.
Каментары