Аўтар рэбрэндынгу «Дынама» распавёў, чаму назваў Лукашэнку «губернатарам беларускай вобласці»
Дызайнер Міхаіл Анціпін пакінуў у твітары каментар, дзе патлумачыў, чаму назваў Лукашэнку «губернатарам беларускай вобласці», піша Tut.by
«Учора ў мяне ў твітары прарвала трубаправод «Дружба». Прычынай прарыву стаў мой іранічны камент. Шчыра сказаць, адчуваю сябе няёмка з-за таго, што даводзіцца тлумачыць сутнасць цалкам відавочнага жарта, але ок.
Навіна аб магчымым правядзенні Алімпіяды з Расіяй — адна з мноства іншых пра розныя сумесныя праекты. На мой погляд, усе яны абумоўлены праектам інтэграцыі Расіі і Беларусі.
Стварэнне адзінай дзяржавы, па вялікім рахунку, накіравана на канкрэтную задачу: легітымна пакінуць Пуціна на новы тэрмін. Мой твіт можа камусьці не падабацца сапраўды гэтак жа, як і ідэя аб'яднання РФ і РБ — мне. Адзінае, што застаецца — іранізаваць над гэтым фарсам», — напісаў Анціпін у сваім твітары.
Нагадаем, што Міхаіл Анціпін і яго студыя Queberten сталі аўтарамі рэбрэндынгу мінскага ХК «Дынама» і ўсіх клубаў чэмпіянату Беларусі.
Каментары