Мэр Мінска: Па спальных раёнах непадалёк ад кальцавой пройдзе трамвайная лінія
Паралельна з будаўніцтвам метро ў Мінску будуць развіваць сетку трамвайных маршрутаў. Фактычна хуткасны трамвай павінен стаць больш таннай альтэрнатывай падземцы. Аб перабудове транспартнай сістэмы горада ў інтэрв'ю «Мінск-Навінам» распавёў старшыня Мінгарвыканкама Анатоль Сівак.
Паводле слоў Сівака, раней горадабудаўнікі недастаткова ўвагі надавалі развіццю трамвайнага руху. Нягледзячы на сваю экалагічнасць, гэты від транспарту пакуль не забяспечвае такую хуткасць перамяшчэння, як метро, а невялікае ДТЗ на трамвайных шляхах можа паралізаваць рух на ўсёй лініі. Аднак у найбліжэйшай будучыні ў Мінску плануюць будаваць прынцыпова новыя трамвайныя лініі, якія не будуць перасякацца з аўтамабільнымі і пешаходнымі патокамі.
«Плануецца вылучыць лініі, якія ніяк не перасякаюцца з аўтамабільнымі транспартнымі патокамі, з пешаходнымі зонамі, усё будзе знаходзіцца на розных узроўнях. 25 існуючых кіламетраў - гэта трамвай, які фактычна працуе ва ўмовах гарадскога аўтобуса. У генплане - 69 новых кіламетраў. Адна вельмі важная для нас лінія, фактычна дублюючая кальцавую дарогу, злучыць станцыі метро і ўсе раёны ўздоўж МКАД. Над хуткасным трамваем мы ўжо працуем», - распавёў Анатоль Сівак.
Старшыня Мінгарвыканкама кажа пра тое, што хуткасны трамвай стане наземным аналагам метро. Такія трамваі не будуць саступаць падземцы па даўжыні састава, колькасці перавезеных чалавек, па магчымасці прытрымлівацца раскладу, з невялікімі інтэрваламі ў гадзіны пік.
«Тут, вядома, сваю ролю грае кошт: кошт пракладкі метро пад зямлёй вышэйшы», — патлумачыў увагу да хуткаснага трамваю Анатоль Сівак.
Каментары